Responsio. It is agreed as it is desired.
Item, sith the said Erle hath take upon him the governance of the Kinges persone, he desireth that alle th’estates, officers, and servantz of the Kinges hous, of what estate and condicion thei be, have special commandement and charge yeven by my Lordes of Bedford and Gloucestre, and by the Lordes of the Kinges Counsail, that in alle manere thinges seyn and advised by the said Erles descrecion, that is, for the Kinges estate, worship, helthe, and profit, by his commandement and ordeignance, thei be attendant and obeissant in accomplisshing therof.
Responsio. It is agreed as it is desired.
Item, for asmuche as the said Erle hath knouleche that in speche that hath be had unto the King at part and in prive, not hering the said Erle nor eny of the knightes set aboute his persone, nor assigned by the said Erle, he hath be stured by summe from his lernyng, and spoken to of diverse materes not behovefull, the seid Erle doubting the harme that mighte falle to the King, and the inconvenientz that mighte ensue of suche speche at part if it were suffred, desireth that in al speche to be had with the King, he or oon of the iiij. knightes, or sum persone to be assigned by the said Erle, be present and prive to it.
Responsio. This article is agreed, excepting suche persones as for nieghnesse of blood, and for their estate, owe of reson to be suffred to speke with the King.
Item, to th’entent that it may be knowen to the King that it procedeth of th’assent, advis, and agreement of my Lord of Gloucestre, and alle my Lordes of the Kinges Counsail, that the King be chastised for his defaultes or trespasses, and that for awe therof he forbere the more to do mys, and entende the more besily to vertu and to lernyng, the said Erle desireth that my Lord of Gloucestre, and my said other Lords of the Counsail, or great part of hem, that is to say, the Chanceller and Tresorer, and of everych estate in the Counsail, spirituell and temporell, summe come to the Kinges presence, and there to make to be declared to him theire agreement in that behalve.
Responsio. Whan the King cometh next to London, all his Counsail shal come to his presence, and there this shal be declared to him.
Item, the said Erle, that all his dayes hath, aboven alle other erthely thinges, desired, and ever shal, to kepe his trouthe and worship unblemysshed and unhurt, and maye not for all that lette malicious and untrewe men to make informacions of his persone, suche as thei may not, ne dare not, stand by, ne be not trewe, besecheth therfore my Lord of Gloucestre, and alle my said Lords of the Counsail, that if thei, or eny of hem, have be enformed of eny thing that may be or soune to his charge or defaulte, and namely in his occupacion and reule aboute the Kinges persone, that the said Erle may have knowleche therof, to th’entent that he may answer therto, and not dwelle in hevy or synistre conceit or opinion, withoute his desert and without answere.
Responsio. It is agreed.
