[40.1] [Add. Charter 17,237, B.M.]
[40.2] [Add. Charters 17,229–31, B.M.]
[29]
JOHN GYNE TO JOHN PASTON[40.3]
To the worthy and worshipful sir and my good maister, John Paston of Trynyte hall in Cambrigge
1435–6
Right worthy and worshipfull sir, and my good maister, I comaund me to yow. Like it yow to witte that on the Soneday next after the Ascencion of oure Lord, in the high weye betwex Cambrigge and the Bekyntre toward Newmarket, I fonde a purs with money ther inne. Th’entent of this my symple lettre is this, that it please to your good Maistership by weye of charite, and of your gentilnesse, to witte if ony of youre knowleche or ony other, swich as yow semeth best in your discrecion, have lost swich a purs, and, the toknes ther of told, he shal have it ageyn, what that ever he be, by the grace of oure Lord, Who ever have yow in his blissed kepyng. Wretyn at Sneylewell the Moneday next after the seid Soneday. By youre pover servaunt, John Gyn.
[40.3] [Add. MS. 34,888, f. 4.] Fenn has written on the MS. of this letter the date ‘circa 1435–6,’ which, I agree with him, must have been about the time that it was written.
[30]
WILLIAM PASTON TO LORD ——[41.1]
1436
Paston recomaund hym to youre good lordeship, willyng with all his herte to doo yow servise to his symple power. And as touching the maner of Walsham he seyth that at your comaundement he wille be redy to shewe yow and preve that the seid maner and all the vesture and crop therof this yeer by trewe title in lawe and conscience is his owen trewly, bowth and in gret party payed for, and that John Roys never hadde non estate in the seid maner, but oonly occupied it by suffraunce of the seid Paston and other feffes in the seid maner, and that be bargayn of the seid maner th’estate that the seid Roys shuld have hadde in the seid maner and in stoor therof shul have be condicionel to be voide and nought for defaute of payement, and that the seid John Roys ne kept not his dayes of the payementz, &c.; and that the seid William Paston, in the lyve of the seid John Roys, for defaute of payment entred in the seid maner with the seid the crop and the vesture of this yeer therof than therupon, and that the seid John Roys never at noo tyme payed to the seid John Baxtere sith the seid bargeyn, nother for the seid bargeyn ne for the dette he aught to hym, more thaune an C. and xl. marcz, wherof he borwed ageyn of the seid John Baxtere xlli.; and over that he oweth and beforn the seid bargeyn aught by his obligacion to the seid John Baxtere, of trew dette of mony borwed, other xlli., and hath hadde and taken the profitz of the seid maner by iij. hool yer before his deth to the value of xxxli. and more, and that he receyved in his said bargayn of the seid John Baxtere xl. marcz worth of stoor; the which iiiixxli. of dette and xxxli. of the profitz of the seid maner, and xl. marcz worth of stoor, maketh the somme of Cxxxvili. xiijs. iiijd. Wherof, thogh the lawe wille it not, were abated, if conscience required it, Cxl. marcz payed by the seid John Roys and xli. for the value of the seid crop, over the value of the verray ferme of the seid maner for this yeer, yet remanyneth dwe to the executoures of the seid John Baxter liijli. vjs. viijd., and all the title and interesse of the seid John Roys his heyres and assignes in the seid maner lawfully and in conscience extincted and adnulled. Wher upon the said Paston lowly besecheth your good lordeship that if it may be preved this mater be trew that ye wille not be displesed thogh he desire to have his fre disposicion of the seid maner.