Right reverent and wurchepfull sir, I recommande me to yow, desyryng to here of yowr welfare, the which gracyows God contynually preserve and kepe to yowr gostly hele and bodily welfare; praying yow to wete that as for the broke sylver that my mastres wend for to a sent yow whan she dede wryte her letter, ther is none in your forcer; she supposyd that ye left it at Norwiche in yowr cofere, wher of ye have the key. Also my mastres yowr moder grete yow wele, and pray yow to send her word how she shall do with Edward of Whode of Paston; for she dede seys his corn on the lond the last hervest, and he led it a wey after that it whas seysyd with awth licens and leve of here or any of here offyceris. Item, my mastres yowr syster recommand her hertly to yow, and pray yow that and ye wold wochesaff to speke to my master Edmund, and pray hym if that he hath bowth here ger that she sent to hym fore, that he wold send it her home; in cas that[93.1] he have not bowth it, that he wold be it and sent it here in all the hast that he may goodly. Forthermore if it plese yow to her of my master Berney, he was at Gresham with my mastres on the Tuysday next after Halwemasday, the same day that we dystreynyd Jamys Rokkysson, and I had mette a litill a fore with Pertrych, and he thrett me, and sayd that we shuld not long kepe the dystresse, and there for my mastres dede us don on owr jakkys and owr salettis. My master Berney cam in and the parson of Oxened with hym and sey us in owre jakkis, and he wexe as pale as any herd and wold right fayn a ben thens. So my mastres dede hym dyne, and whill thei wher at dynar Herry Collys told my mastres openly among us all that the same tyme that Pertrych entryd a geyn up on yow, his master was at Causton to yow ward, and there it was told hym that Pertrych had putt yow owth and all your men, and that ye and my mastres wher redyn a geyn to Norwhich, and all your howshold, and that causyd hym that he cam no forther that tyme; and my Master Berney confermyd all this and seyd that it was so. Whan thei had etyn he had mych hast to a be thens, so my mastres desyryd and prayd hym that he wold come a geyn or aght long; and so with mych praying he be hest her if he mythe. And Herry Collys stode ther bysyde and seyd to my felachep, ‘What shuld my master do here,’ quod he, ‘lete yowr master send after his kynnysmen at Mautby, for thei have nowth that thei mawn lese.’ And so thei redyn her wey. And with in a sevenygt after my master Berney sent Davy to my mastres, and prayd my mastres that she wold hold his master excusyd, for he had hurt his owyn hors that he rode up on; and he dede Davy sadillyn an oder hors; and he stode by and made water whill he sadyllyd hym, and as Davy shuld a kyrt the hors, he slenkyd behynd and toke his master on the hepe suyche a stroke that never man may trust hym after, and brake his hepe. And he had sent Herry Collys to Norwhich for medycynys, so he must ryde hom the same nygt; for his master had no man at home. So my mastres was rygth sory, and wend that it had be trowth, but I know wele that it was not so. It happyd that I rod the next day to Norwhich, and I rood in to my mastres your moder, and she dede aske me after my master Berney, and I told here how he was hurt. And she askyd the parson of Oxened if he wer hurt, and he seyd nay; for Davy lay with hym the same nygt a fore and told hym that he was heyll and mery, and prayd hym that he wold be with hym the Sonday next after; and so Davy lay the same nygt after that he had told my mastres the tale with the parson of Oxened. I beseche yow of yowre gode masterchep that ye wold not do wreythe this letter, for and my mastres knew that I sent yow suyche a letter I were never abyll to loke up on her, nor to abyde in her heysyte. My mastres yowr moder hath sent yow ij. letteris; she hath in dosyd hem to my master Edmunde, and she wuld wete if ye had hem or nawth. The Holy Trynyte have yow in kepyng. Wrytyne at Norwhich on Sent Clementis evyn. In hast. —Your servaunt, Jamis Gloys.
[92.1] [Add. MS. 34,888, f. 57.] This letter bears upon the dispute about Gresham, and is probably of the year 1448, for it is to be presumed that Edmund Paston died shortly after the date of his nuncupative will, 21st March 1449.
[93.1] The word ‘that’ is repeated in the MS. by inadvertence.
she hath in dosyd hem to my master Edmunde
text unchanged: error for “in closyd” or “in dorsyd”?
[82]
MARGARET PASTON TO JOHN PASTON[94.1]
To my ryght worchippfull hosbond, John Paston, be this delyveryd in hast.
1449(?)
JAN. 31
Right worchipfull hosbond, I recommand me to yow, praying yow to wete that I have receyved your letter this day that ye sent me be Yelvertonys man. As for your signette, I fond itt uppon your bord the same day that ye went hens, and I send it yow be Richrad Heberd, bringer herof. As for your eronds that ye wrete to me fore, Richard Charles is owte abough your eronds abowte Gresham, and for his awyn maters also, and I suppose he komyth not hom tyll it be Tesday or Weddenesday next komyng; and alssone as he komyth hom, he shall go abowte your eronds that ye wrete to me fore.
I sent yow a letter wreten on Tesday last past, whiche, as I suppose, Roger Ormesby delyveryd yow. I toke it to Alson Pertryche. She rod with Clyppysbys wyff to London.
I pray yow if ye have an other sone that you woll lete it be named Herry, in remembrans of your brother Herry;[95.1] also I pray yow that ye woll send me dats and synamun as hastyly as ye may. I have speke with John Damme of that ye bad me sey to hem to sey to Thomas Note, and he sey he was wel payd that ye seyd and thowgh therin as ye dede. Ner’les I bad hym that he shuld sey to the seyd Thomas therin as it wer of hymself with owte your avys or any others; and he seyd he shuld so, and that it shuld be purveyd for this next weke at the ferthest. The blyssed Trinyte have yow in his kepyng.