Item, to pay the Lady Pole . . . xxvjs. viijd. for hyr bord.
And if Grenefeld have do wel hys dever to Clement, or wyll do hys dever, geffe hym the nobyll. Agnes Paston.
[123.1] [From Fenn, i. 142.]
[123.2] See vol. ii. p. 155, Note 1.
[363]
AGNES PASTON TO JOHN PASTON[124.1]
Tho my wele be lovyd son, John Paston, be this delyvered in haste.
Sonne, I grete zow wele, and lete zow wete that for as myche as zoure brothir Clement leteth me wete that ze desyre feythfully my blyssyng,—that blyssyng that I prayed zoure fadir to gyffe zow the laste day that ever he spakke, and the blyssyng of all seyntes undir heven, and myn mote come to zow all dayes and tymes; and thynke veryly non other but that ze have it, and shal have it, with that that I fynde zow kynde and wyllyng to the wele of zoure fadres soule, and to the welfare of zoure bretheren.
Be my conseyle dypose zoureselfe as myche as ze may to have lesse to do in the worlde; zoure fadye sayde: In lityl bysynes lyeth muche reste. This world is but a thorough fare, and ful of woo; and whan we departe therefro, rizth nouzght bere with us but oure good dedys and ylle. And ther knoweth no man how soon God woll clepe hym, and therfor it is good for every creature to be redy. Qhom God vysyteth him he lovyth.
And as for zoure bretheren, thei wylle I knowe certeynly laboren all that in hem lyeth for yow. Oure Lorde have zow in his blyssed kepyng, body and soule.
Writen at Norwyche, the xxix. day of Octobyr. Be zoure modir, A. P.