[392]
SIR JOHN FASTOLF AND JOHN PASTON[193.1]
1459
NOV. 26
Memorandum, that I Robert Fytzrawff, Esquyer, recorde that I, beyng in my Master Fastolff chambre, lenyng upon the gret bedde, at suche tyme as John Paston, Esquyer, Master John Brackeley, Master Clement Felmyngham, weere in comonycacion with my seid master of dyvers gret maters towchyng his will, and serten appoyntmentes a twyx my seid master and the seid John Paston, in the weke next be ffor my seid master dissesid, I hard my seid master and the seid John Paston appoynte and conclude that the seid John Paston shulde take upon hym the rwle of my masters howsold and of all his lyflod in Norffolk and Suffolk duryng his lyve; and aftir his dissese the seid John Paston shulde do ffounde a colage at Caster of vij. monkes or prestis, and pay iiij. ml. mark of money be yeres to my seid masteres executoris, at eche payment viijc. marke, till the seid som wer paid; and that the seid John Paston shulde have all the lyvelode that was my seid masters in Norffolk and Suffolk to hym and to his heyres in fee. And aftir this seid mater rehersed my seid master seide these wordes, ‘Cosyne, I pray you and requere you, lete this be settled in all hast withowte tarying, for this is my very last wille.’ Also be it knowe to all men that I had knowlege of this bargayne dyverse tymes halfe-yere past, and how my seid Master Fastolff and the seid John Paston wer nye at a conclucion of the seid maters a quarter of a yere be fore this last bargayne was made.
Wrete at Caster the xxvj. day of Novembre the xxxviij. yere of Kyng Herry the Sexte. In witnesse wherof, I have syngnyd this bull with myn own hand and sette to my seale. Robt. Fetzrawff.
[193.1] [From a Bodl. MS.]
[393]
BISHOP WAYNFLETE’S ADVICE[194.1]
Be it remembred that forasmoch as Sir John Fastolf late decesed, of grete affeccion, hath put me yn trust to be one of hys executors, and seth hyt ys desyryd me to know my disposicion hereynne, myne advyse is this, that fyrst an inventorie be made holye of hys godes and catell yn all places, and thayt they be leyd yn sure waard by your discrecions, tille the executors, or the moste part of tho that he put hys grete trust uppon, speke wyth me and make declaracion to me of hys laste wille, to the accomplyshment whereoff I wolle be speciall gode Lord.
Ferthymore, as touchyng hys buryeng and month ys mynde[194.2] kepyng, that it be don worshyplye, accordyng to hys degree and for the helth of hys soule, and that almesse be yeven yn mass seyng, and to pore peple to the some of a hundred mrcks tille that othyrwyse we speke to geder; and I can agree ryzt well that hys servaunts haf theyr rewardes be tymes accordyng to hys wylle, to th’entent that they may be better disposed and to pray for the wellfare of hys soule, takyng avyse of a lerned man yn spirituell lawe, for no charge of administracion till the executors com to ghedr, or the moste part that hys trust was most uppon, to tak the administracion. W. Winton.
[194.1] [From Fenn, iii. 358.]
[194.2] A monthly celebration in memory of a deceased person, when prayers were said and alms offered for the good of his soul.