I wright unto you in this be halfe, be cause I understood he woll be moche avised by you, and yf he do ony thynge at my request, I schall do as moche that schall plese hym; and also the pore man schall gef hym ij. nobles or xxs. rather than fayle. I pray you be as good a mene for hym as ye may in this be halfe, as my verry trust is in you, and I schal be redy at all tymes to doo that may be to your plesur. I trust to Jesu, who have you in His kepyng, and sende you joy of all your ladyes.
Wretyn at Lederyngham, the Tewesday in Whisson weke. Your brother and frende, Wyngefeld J.
[259.2] [From Fenn, iii. 140.]
[440]
[JOHN PASTON?] TO [RICHARD] SOUTHWELL[260.1]
Brother Suthwell, I comand me to yow, sertifiing yow that, on Thursday be the morwe, I spak with my cosine Wichingham at London, where he lete me wet of the letter sent to Lee, wherby I conseyve the stedfast godlordship and ladiship of my Lord and my Lady[260.2] in this mater, &c., whech gevith cause to all her servaunts to trost verily in them and to do hem trew servise. I lete yow wete that the seid Wychyngham, when I departid from hym, had knowleche that Jane Boys shuld that nyght be come to London, and he put in a bylle to the Lordis for to have delyverauns of hyr and to have hese adversarys arestid. And this nyght at Norwiche was told me newe tydyngges that she shuld on Thursday after my departyng a be before the Lordis and there asaide untrewly of her selff, as the berer hereof shal informe yow if ye know it not before; of wheche tydyngges, if they be trew, I am sory for her sake, and also I fere that her frendys schuld sewe the more feyntely, wheche Godde defende. For her seyng untrewly of her selff may hurt the mater in no man but her selff; and thow she wol mescheve her selff, it wer gret pete but if the mater were laborid forth, not for her sake, but for the worchepe of the estatys and other that have laboryd therin, and in ponyshing of the gret oryble dede. Wherfore I send yow dyvers articlis in a bill closid herin, wheche preve that she was raveshid ayens hyr wel, what so ever she sey.
Thes be provis that Jane Boys was ravischig [sic] ageyn her wil, and not ber awn assent.
One is that she, the tyme of her takyng, whan she was set upon her hors, she revyled Lancasterother[261.1] and callid hym knave and wept, and kryid owte upon hym pitewly to her, and seid as shrewdly to hym as coud come to her mende, and fel doune of her hors unto that she was bound, and callid him fals t[r]aytor that browth her the rabbettes.
Item, whan she was bounde she callid upon her modyer, wheche folwyd her as far as she myght on her feet, and whan the seid Jane sey she myght goo no ferther, she kryid to her modyer and seid that what so ever fel of her, she shuld never be weddyd to that knave, to deye for it.
Item, be the weye, at Shraggarys hous in Kokely Cley, and at Brychehamwell, and in all other places wher she myght see any people, she kryid owte upon hym, and lete people wete whos dowtyr she was, and how she was raveshid ayens her wyll, desyeryng the people to folwe her and reskew her.
Item, Lancasterotherys prest of the Egle in Lyncolne shire, wheche shroff her, seid that she told hym in confession that she wold never be weddyd to hym, to deye for it; and the same prest seid he wold not wedde hem togedyr for Ml.li.