Ryght worschipfull sir, I recomaunde me unto your mastreschip, certifiyng you that Jenney and Yelverton hathe certified up in to the Kynges Benche inssurrecions [and] congregacions a yenste me; wherupon they have sente to the scheryff a writte chargyng hym in peyne of Cli. to brynge me in to the Kyngs Benche the morwe after Sein Marteyn. And this daye the seide Jenney hathe sent doune to the scheryff an other writte called an habeas corpus retornable crastino Animarum, weche schalbe on Twesday next comyng be cauce they were in dought and in greete feere that I schulde have ben aquytte of the inditement of fellony now at this gayle delyverye. And also my maistre hathe sente an other writte for me retornable at the seid crastino Animarum. And so I am like to ride to London warde to morwe. And the scheryff wold make me to fynde suerte that I schulde appere in the Kyngs Benche the seid daye; and yet, that notwithstandyng, he wolde send me with strengthe of men as a presoner; and if any thynge schall cauce me that I goo not up to London, it schalbe be cauce I woll fynde no suerte; for in cas he wold have suffred me to have gon up be my selfe at myn owne coste, I wolde have founde hym suertee. And so at the makyng of this bille we were not fully condesended hough we schulde doo. My mastre is in goode hele, blissed be Godd, and dothe and schall doo ryght weele in alle hes maters. Ther is an ongracious felaschip of hem and a fals. They have sent for Fitzraff and Schipdam, be a citacion for the proffe of the testement, and alle is but for to delay it; yet it were weele done ye rode over to Fitzraff and felte hes disposicion how he woll be disposed, and in like wice with Schipdam, for I have spoken with hem of that matre, in cas that any citacion come doun for hem, how they wolde be disposed, and I have founde the too straunchely disposed. God send us a good scheryf thys yere, and thanne we schalle do weele inough, be the grace of God.
And, sir, your man tolde me that ye desired to knowe the demenyng at Cotton of the tenaunts and other. I lete you wete the moste parte of alle the tenaunts have bene here with me for to see me, and they have tolde me all the demenyng as it is undrewrete. Furst, as for the money that they receyved there it drwe upon a xxiiijti li. and more silver, for the tenaunts myght not cheese but they moste nedes paye, for they distreyned on my Lords of Suffolk fee, my Lords of Norwich fee, and on all men grounde, so that they myght not have her catell in reste, weche cauced hem to paye her money. I knowe weele i nough who payed and wo paied not. All the grete fermours have payed. And as for the kepyng of the place ther be therin iiij. men, and on of Debenham men, called Sokelyng, and hes wyff, and on Mannyng, a tenaunt, a fals knave; and they have enforced them as stronke as they kan, and they have broken doune the brigge and have leide a planke over, in cas that ye go theder ye may not come at Dale is howce in no waie, for he have had meche trouble for my mastre and for me; but and ye wolde gete my Lords meane and pulle the knaves out be the heede, it were weele done. I purpose me to com hom warde that same wey. Item, I lete you witte that the gayle delyverye holdeth not this daye, and alle is doone be cauce of mee, Jenney wolde not lete the clerke of peas come hether this daye for feere that I schulde have been aquytte of the felonye, for in trouthe and tho it had holden, I had founde the meane for to have ben quytte, for I whas through with the scheryff and panel made aftyr myn avice; but though the gayle delyver had holden, I cowde not have ben delyverd, becauce of thes writtes that be come downe. Item, the scheryff hathe a grete losse that this daye holdethe not, for ther schulde have ben quytte xl. men this daye. Item, the scheryff tolde me that my maistre tolde hym that I whas assent to my takyng at Scoolys, weche was to me ryght greete hevynes and discomforture nough in my trouble. And God knoweth it was never my wylle ner myn entent, as I mot be saved at the dredful day of Dome; for ther is no man so sore hurte as I am be the takyng, bothe in losse, and also in reprefe of myn owne persoune and of my frends, withoute that my mastre be my good maistre, as I truste he wolle be, or elles I am disseyved. He hathe my trewe servyce and shal have whylle that I leve, what so ever his mastreschip do to me, but I can thynke he hathe be enformed be myn elmyes [enemies] that wold make hym disp[l]esed with me, and to be myn evy [heavy] mastre, but dissimulacion dothe muche harme, &c. I reporte me, &c. No more to you at this tyme, but Jesu kepe you, and send you as much fortune and grace as I wolde ye had, &c. I beseche [you] to be my goode mastre as ye have be, for I never deserved nor wol deserve the contrary. Your servaunt, Ric. Calle, presoner.
[318.1] [From Paston MSS., B.M.] This letter was written in a year in which the morrow of All Souls’ Day (i.e. the 3rd November) fell on Tuesday. The Dominical letter of the year must therefore be D. This was the case in 1461, and no other year will suit a letter addressed to John Paston, junior. For if we go back there is no earlier year in which D was the Dominical letter till we come to 1450, when John Paston, junior, was only ten years old; and if we go forward the next is 1467, which was after John Paston the father’s death.
END OF VOLUME III
Printed by T. and A. Constable, Printers to His Majesty
at the Edinburgh University Press
[Contents of Volume III]
(added by transcriber)
| Year | Letter | |
|---|---|---|
| Henry VI | 1454 | [260] |
| 1455 | [270] | |
| 1456 | [314] | |
| 1457 | [354] | |
| 1458 | [361] | |
| 1459 | [374] | |
| 1460 | [398] | |
| 1461 | [429] | |
| date uncertain | [435] | |
| Edward IV | 1461 | [449] |
[Title Page]
THE