Also the seid John Russe writyth in his lettir that rather thanne he shuld fayle this mony that I wold lend hym asmoch to pay ayen at Cristemasse; wherfore, if he leve his bargeyn I woll ye lend hym asmoch mony over his dewte as shall make up xxli., takyng of hym suerte to pay ayen at Cristemasse, as he writyth; in case be that he will kepe stille his bargeyn, thanne ye may answere hym it is no reason that he shuld aske me any part of that mony ayen, for he owyth that and moch more.
Item, the seyd John Rus sent me heder a man for this mater only with in thes ij. daijs. Wherfor let him know an ansue letyng (?) for I fel well (?) he hath mad agret bargen but late, wherfor he hath mor nede of mony now, and I wol do for hym that I may resonably. Nevertheles his wryting merveylith me that he askith thes mony as dewte, wheche he toke me for parte of my payment. I deme it comith not all of his owne disposicion. Inquier ye that ye can what it menith. God kepe yow. Wret the Wednisday nex Lammes. Yowr John Paston.
In cas ye han Drayton in any quiete take sewertie of yowr tenants for paiment as I have wret befor.
[174.1] [From Paston MSS., B.M.] This is evidently the letter referred to in the beginning of the last.
[602]
JOHN ESTGATE TO ——[177.1]
1465
Ser, ze sent to me a letter conteynyng the substaunce of the processe off Mr. Robert Ippyswell for the mater off the codicill of Nicholas Pykeryng, &c. Me mervelyt gretly off the certificat off Mr. Robert in that be halve, for this is the truthe as forth forth as I kan remembre me. The codicill had nether day nor place lymyte, qwer or qwan it xuld a ben mad; qwerfor to a reprovyd that that nether was qualifyid with day nor place it had be gret foly, &c. Therfor I askyd off the juge hys accounts, and specyally the deposicionys and attestacionys off the wytteness that wer swor in the seyd codicill, &c.; by the qwyche it mowth appere clerly qwan and qwere this codicill xuld a be made and wrete. And this sen I mad protestacion to for the seyde Mr. Robert that I wolde impugne the mater as lawe requiryd. The qwych peticion I made diverse tyme to fore moche recorde, judicialy syttyng the seyde M. R.,[177.2] &c. The qwyche peticion he wold not her, but seyde expresse that nether Will. Pykeryng nor non other man xuld sen his accounts nor knowe qwat the deposicion wer in that parte; this mater was comownyd to for Mr. John Selet and my mayster and yours diverse tymys, and ever he seyde we xuld not sen the seyde deposicions. And so qwat sum ever he hath certyfyid, this is the truthe, God to wetenesse and all Seynts, qwo preserve zow evermore.
And I pray zow to declare this to my mayster and zours; and comende me hertly to hys good maysterchep. And God sende hym victorye off all hys elmyes, and so pray all hys well wyllers at Norwich. John Estgate.
[177.1] [From Paston MSS., B.M.] The writer of this letter is reported to be dead in [No. 604], which was written on the 18th August 1465. We have little doubt, however, that this belongs to the same year, as the names of Robert Ippeswell and John Salet occur in the correspondence more than once about this time.
[177.2] Master of the Rolls.