[187.1] This must be John Flowerdew, presented by John Paston and Thomas Howes in 1461.

[187.2] John Paston.

[609]
JOHN PASTON TO MARGARET PASTON[188.1]

To my Cosyn Margret Paston.

1465
SEPT. [21]

Myn owne dere sovereyn lady, I recomaund me to yow, and thank yow of the gret chere that ye mad me here to my gret cost and charge and labour. No more at thys tyme, but that I pray yow ye woll send me hedir ij. clue of worsted[188.2] for dobletts, to happe me thys cold wynter; and that ye inquere where William Paston bought his tepet of fyne worsted, whech is almost like silk, and if that be mech fyner thanne that he shuld bye me after vij. or viij.s., thanne by me a quarter and the nayle therof for colers, thow it be derer thanne the tother, for I wold make my doblet all worsted for worship of Norffolk, rather thanne like Gonnores doblet.

Item, as for the mater of the ix.xx.li. askyd by my Lady of Bedford[188.3] for the maner of Westthirrok, where as Sir Thomas Howes saith that he hath no wrytyng therof, but that Sir John Fastolf purchased the seid maner, and payd serteyn money in ernest, and aftirward graunted his bargeyn to the Duc of Bedford, and so the money that he toke was for the mony that he had payd. Peraventure Sir Thomas hath writyng therof, and knowyth it not; for if ther be any such mony payd upon any bargeyn he shall fynd it in Kyrtlyngs bocks that was Sir John Fastolfs reseyver, and it was abought such tyme as the Duc of Bedford was last in Inglond, whech, as it is told me, was the viij. yere of Kyng Herry the fift, or the viij. yere of Kyng Herry the sext, and the somme that he payd for the seid bargeyn was CCC. marks. Also he shall fynd, the xxij. yere of Kyng Herry or ther abought, in the acompts of on of Fastolfs Reseyvors at London, that ther was take of Sir Thomas Tyrell, and of the Duchesse of Excestre,[189.1] that was wif to Sir Lowes John, fermours of the seid maner, serteyn mony for repayment of part of the seid CCC. marks. Also he shall fynd in yeres after that, or in that yere, or ther aboutes, that Sir John Fastolf reseyved mony of my Lord Revers[189.2] that now is, by the name of Richard Wydevile, for his owne dette dew to Sir John Fastolf; wherfore, if Sir Thomas be trewe to his master, lete hym do his devoir to make that Worseter, whech is uphold be hym with the deds goods, to be trewe to his master, or ellis it is tyme for Sir Thomas to forsake hym, and helpe to punyssh hym, or men mast sey that Sir Thomas is not trewe; and more over lete Sir Thomas examine what he can fynd in this mater that I sent hym werd of, whech mater he shall fynd in the seid Reseyvours bocks, if he list to seke it.

Item, on the day after your departyng, I reseyved letters by Will. Ros from your sones to me, and to yow, and to Ric. Calle, &c.

Item, I shall telle you a tale,

Pampyng and I have picked your male[190.1]