[305.1] William Grey, Bishop of Ely.
[305.2] William Herbert, Earl of Pembroke.
[305.3] See [page 188, Note 3].
with my Lorde the Archebisshop of Yorke
text has “Lorae” (italic “a” for “d”)
[691]
SIR JOHN PASTON TO JOHN PASTON[306.1]
To my ryght welbelovyd brother, John Paston, Esqer, beyng at Caster, or to John Dawbeney there, be this letter delyvered.
1468
NOV. 9
Ryght welbelovyd brother, I comand me to yow, letyng yow wete that I have wagyd for to helpe yow and Dawbeney to kepe the place at Castr, iiij. wel assuryd and trew men to do al maner of thyng what that they be desyryd to do, in save gard or enforcyng of the seyd place; and mor ovyr they be provyd men, and connyng in the werr, and in fetys of armys, and they kan wele schote bothe gonnys and crossebowes, and amende and strynge them, and devyse bolwerkys, or any thyngs that scholde be a strenkthe to the place; and they wol, as nede is, kepe wecche and warde. They be sadde and wel advysed men, savyng on of them, whyche is ballyd, and callyd Wylliam Peny, whyche is as goode a man as gothe on the erthe, savyng a lytyll he wol, as I understand, be a lytel copschotyn [high-crested], but yit he is no brawler, but ful of cortesye, meche uppon James Halman; the other iij. be named Peryn Sale, John Chapman, Robert Jakys Son, savyng that as yit they have non harneyse comyn, but when it komyth it schall be sent to yow, and in the meane whyle I pray yow and Dawbeney to purvey them some.
Also a cople of beddys they most nedys have, whyche I pray yow by the help of my modre to purvey for them, tyl that I com home to yow. Ye schall fynde them gentylmanly, comfortable felawes, and that they wol and dare abyde be ther takelyng; and if ye undrestond that any assawte schold be towardys, I sende yow thes men, becawse that men of the contre ther about yow scholde be frayed for fer of losse of ther goods; wherfor if ther wer any suche thyng towards, I wolde ye take of men of the contre but few, and that they wer well assuryd men, for ellys they myght discorage alle the remenant.
And asfor any wryghtyng fro the Kyng, he hathe promysyd that there schall come non; and if ther do his unwarys [without his knowledge], yowr answer may be thys, how the Kyng hathe seyd, and so to delay them tyll I may have worde, and I schall sone purvey a remedy.