To hys rythe worchyfull broder, John Paston thelder, Sqwyer be this delyveryd.
1464
FEB. 15
Broder, I recomawnde me to zowe. After all dew recommendacions, &c. Az for Hew Fennys obligacion, Zelverton knowlacheyd it to be Sir John Fastolfe is dede opynly in the Escheker, and ther he hadde is jugement to receive the mony and xli. for domages. And they report here that they have a schreve after her entent that wyll mak hem execucion, or ellis return that ye have wastyd the godis of the dede; so that they wyll have execucion of zowr own goodis, or ellys a wryt to tak zowr body. Thus ze may se they zeve no fors wat they doo, thow they xwld lesse and stroy all the goodis of the dede; And ther for, for savacion of goodis of the dede, better it wer to suffer tak sum trete than to suffer the goodis thus to be lost. Also Zelverton hathe ben at all the tenauntis of Sowthewerk and chargid hem to pay no mony but to hym. Also the kyng hathe ben in Glowcetescher and pwnyssede hys rebellious a zens the lawe, and so he entendithe to doo in Norfolk, and after that in oder contreez. God zeve grasse and good spede in hys jornay. No more but I pray Gode have zow in hys kepyng. Wretyn on Hasse Wednysday in haste.
Also I pray zou, send me xls. that I tok James Gressam and John Pampyng for zowr materis. Also ther is no man that hathe contentyd ony thyng in the Kyngis Benche of all thys term for zour materis, and that makythe the clerkis and zowr Aturnay wery. I trow I xall be fayn to contente hem or ellys they xall be unpayyd. Zowr broder, Clement Paston.
[91.2] [Add. MS. 34,889, f. 2.] For the date of this letter and the King’s going to Gloucestershire, see preliminary note to [No. 555], [p. 88, Note 1].
[558]
RICHARD CALLE TO JOHN PASTON[92.1]
To my mooste reverent and wurchipfull mastre, my Mastre John Paston, be this delyverd.
1464
FEB. 27
Plesith it your goode mastreschip to undrestande that I have receyved a byll of John Boteler, weche speketh of your heygh at Heylesdn, and of your barly in other places, but I undrestand not what ye wold I schulde do therin; nevertheles I schal do make it redy. And as for your heygh I schull tell you whan I come hume; and as for money at Heylesdon I can non gete, and at Sueynesthorp I have take iiij. marc.
Item, as for tidyngs the Sescions schal be at Thetford on Wednesday next comyng, where I undrestande Mr. Berney wol be with moche people, be cauce ther is come to hym a Prevy Seale that he schuld be with the Kyng within vj. dayes that the Prevy Seale whas delyverd hym, weche he can not doo, for the vj. day is to morwe. Ther is on comen to Felbrigge, to William Yelverton on other, and to Robert Rough an other, and non of them wol goo to the Kyng; and the Undrescherif tolde me that ther is comen a comyscion doun to hes maistre, that in cas they come not up to the Kyng be ther Prevy Seales, that than he rere the contre and take hem and bryng hem to the Kyng wher so ever he be.