Item, recomaund me to Master Robert Popy, and telle hym, as for any thyng seid ayens hym in my mater then myn adversaris ment ontrewly, they proved nought but that he is a good man and a worshipfull and a trewe.
Item, if I have any otis beside my stuffe, or may any bye aftir xiiijd., spare not, and take good mesure of bartirre for some other chafers, and send me word hough moch ye may bye.
Item, it is told me ye make no wood, nowther at Caster nor Mautby, wherof I merveyle; remembir yow we must brenne wood a nodir yere.
Item, I send yow a titelyng that I mad whill I was at home, what malt I had by estimacion set at the lest; wherfore see that Brigge make a reknyng of his malt, and cast ye my book and loke what ye can amend it; and apeyre [impair] it shall not if alle folkis have do trewly; but I suppose fewe of you have take any heed at it as moch as I ded.
Item, I may selle here for vjs. viijd. a quarter clene fyed after Royston mesure, whech is lesse thanne the water mesure of London. Cambrigge shire malt is here at xs. Cast ye what I may selle of new and old, savyng stuffe for myn hows. Item, to remember that Guton malt must be shipped at Blakeney. Item, Lynstedis malt at Wolcote may be shipped there; therfore cast amongis yow what malt may best be sold.
Item, if on [one] man may not attende to gader silver, sende a nother, and send me word what hath be reseyved and spent.
Item, that I have an answer of alle my lettirs and of every article in hem.
Item, but if ye make such purvyauns that my prestis be paiid and pore men, beside other charges, and purvey mony for me beside; owther ye gadir shrewdly or ellis ye spend lewdly.
Item, I sent a lettir by Rauff Greneakyr to James Gresham and to yow, which he promised me shuld be at Norwich on Wednesday aftir Thwelth day, and therin wer divers maters; and in especiall of a mater that shuld be in communication on Teusday last past bethwyx Yelverton and Robert Wyngfeld, as in the seid lettir is specifiid. It is so that the seid Robard shall be here within this ij. dayes; if any thyng ye have aspied of it send me word. Item, yonge Knevet tellith me that he is my good frend, and he is come ridyng homeward on Friday last was. I pray yow, ley wetche whedir ye here any thyng that he medillyth hym at that mater, and send me word; for I wold understand whedir he wer just and trew or nought, and that do [done] it shall not ligh in his power to hurt me. But take ye hed and inquere and knowe other mennes purpos, and kepe your intent as close as ye can; and what some evir boost be mad, werk ye wisely and set not by it but send me word what ye here.
Item, Calle sendyth me word that Sir Thomas Howes is seke and not like to askape it, and Berney tellyth me the contrary; wherfore I pray yow take hed therat, and lete me have knowleche, for though I be not behold to hym I wold not he were ded for more thanne he is worth.