1472
FEB. 17
Brother, I comande me to yow, and praye yow to loke uppe my Temple of Glasse,[135.3] and send it me by the berer herof.
Item, as for tydyngs, I have spoken with Mestresse Anne Hault, at a praty leyser, and, blyssyd be God, we be as ffer fforthe as we weer toffoor, and so I hoope we schall contenew; and I promysed hyr, that at the next leyser that I kowd ffynde therto that I wolde come ageyn and see hyr; whyche wyll take a leyser as [I] deeme now; syn thys observance is over doon, I purpose nott to tempte God noo moor soo.
Yisterday the Kynge, the Qween, my Lordes of Claraunce and Glowcester, wente to Scheen to pardon; men sey, nott alle in cheryte; what wyll falle, men can nott seye.
The Kynge entretyth my Lorde off Clarance ffor my Lorde of Glowcester; and, as itt is seyde, he answerythe, that he may weell have my Ladye hys suster in lawe, butt they schall parte no lyvelod, as he seythe; so what wyll falle can I nott seye.
Thys daye I purpose to see my Lady off Norffolk ageyn, in goode howr be it!
Ther is proferyd me marchaunts ffor Sporle woode. God sende me goode sale whan I be gynne; that poor woode is soor manashed and thrett.
Yitt woote I nott whether I come home beffoor Esterne or nott, I schall sende yow worde. No moor, &c.
Wretyn the ffyrst Tewesdaye off Lenton. John Paston, K.
[135.2] [From Fenn, ii. 90.] After the death of Prince Edward, the son of Henry VI., who is said to have been murdered just after the Battle of Tewkesbury in May 1471, Richard, Duke of Gloucester, married his widow Anne, who was the daughter of Warwick the Kingmaker. The reference to the proposed sale of Sporle wood goes further to fix the date. See [Letter 793], and Nos. [819] and [820] following.