Aftyr all dewtes of recomendacyon, lyeketh yow to weet that I ensuer yow your sendyng to Caster is evyll takyn among my lordes folkes, in so myche that some sey that ye tendryd lytyll my lordes dethe, in as myche as ye wold so sone entre upon hym aftyr hys dyssease, with ought avyse and assent of my lordes consayll; wherfor it is thought here by syche as be your frendes in my lordes house that if my lady have onys the graunt of the wardshepp of the chyld,[247.2] that she wyll ocupye Caster with other londes, and ley the defaute on your unkynd hastyness of entre with ought hyr assent. Wherfor in eny wyse get yow a patent of the Kyng ensealyd be for hyrs, and ye may by eny meane possybyll.
Also I prey yow comon with my Lord Chamberleyn for me, and weet hough that he wyll have me demeanyd.
It iss told me for serteyn that ther is none hey to gete at Caleys; wherfor if I mygh be pardond for eny kepyng of horse at Caleys till Myd somer, it wer a good torne.
The berer herof shall come home ayen fro London with in a day aftyr that he comyth thedyr, if ye wyll ought comand hym. I prey yow send me woord by hym hough ye do with your maters, and I prey yow in eny wyse lete me undyrstand, by the berer heroff, hough Bowen of the Cheker wyll dele with me; vjxx. and xli. it is nough, and I wold have vijxx.li. and xli. and I to plege it ought in iiij. or v. yer, or ellys to forfet the maner.
Wretyn at Norwyche, the Twysday next aftyr your departyng thens, xxiij. die Januarii, anno E. iiijti xvo. John Paston.
[247.1] [From Paston MSS., B.M.]
[247.2] This child was Ann, who soon after was betrothed to Richard Plantagenet, Duke of York, the second son of King Edward. She died very young, and the Duke was, as it is supposed, smothered in the Tower by the command of his uncle Richard III.—F.
[884]
SIR JOHN PASTON TO JOHN PASTON[248.1]
To John Paston, Esquier, at Norwyche, be thys delyveryd.
1476
JAN. 27