As for my lorde, I undrestande nott yitt whethyr he wylle in to Ingelonde the weke to foor Esterne, or ellys aftre.
I pray yow recomande me to my moodre. I wolde have wretyn to hyr, but in trowthe I ame somewhatt crased, what with the see and what wythe thys dyet heer.
No moor to yow, but wretyn at Gynes, the xij. daye off Marche, anno E. xvj. By John Paston, K.
[256.1] [From Paston MSS., B.M.]
[256.2] Hastings.
[889]
SIR JOHN PASTON TO MARGARET PASTON[257.1]
To Mestresse Margrete Paston, at Norwyche, or hyr sone, John Paston, Esquyer, and to everych off them.
1476
MARCH 21
I recomande me to yowe. Like it yow to weete that I am nott sertayne yitt whether my lorde[257.2] and I shall come into Ingelonde the weke byffoor Est[er]ne, or ellys the weke afftr Est[er]ne; wherffor, moodr, I beseche yow to take noo dysplesyr with me ffor my longe tarynge, ffor I most doo noon otherwyse ffor dysplesyng off my lorde. I was noo thynge gladde off thys jornaye, iff I myght goodely have chosen; neverthelesse, savyng that ye have cawse to be dyspleasyd with me ffor the mater off Kokett, I am ellys ryght gladde, ffor I hope that I ame fferre moor in ffavor with my lorde then I was to ffoor.
Item, I sende yow, brother John, a letter herwith, whyche was browte hyddr to Caleys, ffrom the George at Powles Wharff; I deme it comethe ffrom my brother Water.