[24.3] [From Paston MSS., B.M.]

[713]
RICHARD CALLE TO MARGERY PASTON[25.1]

1469

Myn owne lady and mastres, and be for God very trewe wyff, I with herte full sorowefull recomaunde me unto you, as he that can not be mery, nor nought shalbe tyll it be othewise with us then it is yet, for thys lyf that we lede nough is nowther plesur to Godde nor to the worlde, consederyng the gret bonde of matrymonye that is made be twix us, and also the greete love that hath be, and as I truste yet is be twix us, and as on my parte never gretter; wherfor I beseche Almyghty Godde comfort us as sone as it plesyth Hym, for we that ought of very ryght to be moost to gether ar moost asondre; me semyth it is a mll. [thousand] yere a goo son that I speke with you. I had lever thenne all the goode in the worlde I myght be with you. Alas, alas! goode lady, full litell remembre they what they doo that kepe us thus asunder; iiij. tymes in the yere ar they a cursid that lette matrymonye; it causith many men to deme in hem they have large consyence in other maters as wele as herin. But what lady suffre as ye have do; and make you as mery as ye can, for I wys, lady, at the longe wey Godde woll of Hys ryght wysnes helpe Hys servants that meane truly, and wolde leve accordyng to Hes lawys, &c.

I undrestende, lady, ye have hadde asmoche sorwe for me as any gentelwoman hath hadde in the worlde, aswolde Godd all that sorwe that ye have hadde had rested upon me, so that ye hadde be discharged of it, for I wis, lady, it is to me a deethe to her that ye be entreted other wise thene ye ought to be. This is a peyneful lyfe that we lede. I can not leve thus withoute it be a gret displesure to Godde.

Also like you to wete that I had sent you a letter be my ladde from London, and he tolde me he myght not speeke with you, ther was made so gret awayte upon hym and upon you boothe. He told me John Threscher come to hym in your name, and seide that ye sent hym to my ladde for a letter or a token, weche I shulde have sent you, but he truste hym not; he wold not delyver hym noon. After that he brought hym a rynge, seyng that ye sent it hym, comaundyng hym that he schulde delyver the letter or token to hym, weche I conceyve sethen be my ladde it was not be your sendyng, it was be my mastres and Sir Jamys[26.1] a vys. Alas, what meane they? I suppose they deeme we be not ensuryd to gether, and if they so doo I merveyll, for thene they ar not wele avised, remembryng the pleynes that I breke to my mastres at the begynnyng, and I suppose be you bothe, and ye dede as ye ought to do of very ryght; and if ye have do the contrare, as I have be enformed ye have do, ye dede nouther concyensly nor to the plesure of Godde, withoute ye dede it for feere, and for the tyme to please suche as were at that tyme a boute you; and if ye so dede it for this service it was a resonable cause, consederyng the grete and importable callyng upon that ye hadde, and many an on trewe tale was made to you of me, weche God knowt I was never gylty of.

My ladde tolde me that my mastres your modre axyd hym if he hadde brought any letter to you, and many other thyngs she bare hym on hande,[27.1] and a monge all other at the last she seide to hym that I wolde not make her prevy to the begynnyng, but she supposyd I wolde at the endyng; and as to that, God knowt sche knewe furst of me and non other. I wott not what her mastreschip meneth, for be my trowthe ther is no gentylwoman on lyve that my herte tendreth more then it dothe her, nor is lother to displese, savyng only your person, weche of very ryght I ought to tendre and love beste, for I am bounde therto be the lawe of Godde, and so wol do whyle that I leve, what so ever falle of it. I supose, and ye telle hem sadly the trouthe, they wold not dampne ther soules for us; though I telle hem the trouthe they woll not be leve me as weele as they woll do you; and ther for, goode lady, at the reverence of Godde be pleyne to hem and telle the trouthe, and if they woll in no wise agree therto, betwix God, the Deelf, and them be it, and that perell that we schuld be in, I beseche Godde it may lye upon them and not upon us. I am hevy and sory to remembre ther disposicion, God sende them grace to gyde all thyngs weele, as wele I wolde they dede; Godde be ther gide, and sende them peas and reste, &c.

I mervell moche that they schulde take this mater so heedely as I undrestonde they doo, remembryng it is in suche case as it can not be remedyed, and my desert upon every be halfe it is for to be thought ther shulde be non obstacle a yenst it; and also the worchipfull that is in them, is not in your mariage, it is in ther owne mariage, weche I beseche Godde sende hem suche as may be to ther worschip and plesur to Godde, and to ther herts ease, for ell[es] were it gret pety. Mastres, I am aferde to write to you, for I undrestonde ye have schewyd my letters that I have sent you be for this tyme; but I prey you lete no creatur se this letter. As sone as ye have redde it lete it be brent, for I wolde no man schulde se it in no wise; ye had no wrytyng from me this ij. yere, nor I wolle not sende you no mor, therfor I remytte all this matre to your wysdom. Almyghty Jesu preserve, kepe, and [give] you your hertys desire, weche I wotte weele schulde be to Goods plesur, &c.

Thys letter was wreten with as greete peyne as ever wrote I thynge in my lyfe, for in goode feyth I have be ryght seke, and yet am not veryly weele at ease, God amend it, &c.

[25.1] [From Fenn, iv. 350.] This letter was evidently written about the same period as [No. 710]. The original appears to have had no address, although Fenn prints one in the right-hand copy; but on the back was the following memorandum, evidently not quite contemporary: ‘Litera Ric’i Calle Margeriæ Paston filiæ Joh’is Paston ar’i quam postea duxit in uxorem.’