[The reference to the King’s being in Norfolk fixes the date of this letter to the year 1469.]
[33.1] [From Paston MSS., B.M.]
[718]
JOHN AUBRY[34.1] TO SIR HENRY SPELMAN[34.2]
To the right reverent Sir Henry Spelman, Recordor of the Cite of Norwich, be this Letter delivered.
1469
JULY 9
Right reverent sir, I recomaunde me to you. Plese it you to knowe, this same day com to me the Shirreve of Norffolk[34.3] hymself, and tolde me that the Quene shall be at Norwich up on Tuysday[34.4] cometh sevenyght suyrly. And I desired to have knowe of hym, by cause this shuld be hir first comyng hedir, how we shuld be rulyd, as well in hir resseyvyng, as in hir abidyng here. And he seide, he wold nat ocupie hym ther wyth, but he councelid us to wryte to you to London, to knowe of hem that ben of counsell of that cite, or wyth other wurshepfull men of the same cite, that ben knowyng in that behalf, and we to be ruled ther aftir, as were acordyng for us; for he lete me to wete that she woll desire to ben resseyved and attendid as wurshepfully as evir was Quene a forn hir. Wherefore, sir, I, be the assent of my Bretheren Aldermen, &c., prey you hertily to have this labour for this cite. And that it plese you, if it may be, that at that day ye be here in propre persone; and I trust in God, that outher in rewards, or ellys in thankynges, both of the Kyngs comyng, and in this, ye shall ben plesid as worthy is.
Wrete in hast at Norwich the vj. day of Juyll Anno ixo Regis E. quarti. By your weelwyller, John Aubry, &c.
[34.1] Mayor of Norwich in 1469.
[34.2] [From Fenn, ii. 18.]
[34.3] Roger Ree was Sheriff of Norfolk this year.