[1039]
WILLIAM PASTON TO SIR JOHN PASTON[129.2]
To hys brodyr, Syr John Paston.
1489
MAY
Syr, I recomaunde me on to yow. And where as ye desyre that I schulde sende yow worde of suche tydyng as Phylyp Lewes and Wyndesor bryngythe fro the corte, they be come thens bothe, but we here of no tydynges that they brynge, but that yondyr folkys abyde stylle abowte the place where as thys onhappy dede was done, and not with no grete nowmbyr, they sey not paste with v. or vj. C., where they were moste. Howbeyt they have made proclamacions in the cuntrey to mete with oder of ther affynyte as on Tuesday last past, as it aperythe in the copy of ther proclamacion heraftyr folowyng. Also they schewe the Kynge intendythe to holde on hys jurney. And Phylyp Lewes is redyn ageyn to the Kyng, and schall brynge with hym money for all ther wages that schall be in my lordys retynew, as yow and vj. of Syr Wylliam Bolens servauntes and od[yrs].
Syr, Mr. Clopton sye [saw] yowre lettyr, and a seythe he knew my lordes mende suche, that he durste not meve hym with it. Ther was Syr Wylliam Say, but Clopton wolde not it schulde be knowen of non other but your selfe. He sent my lorde be a servaunt of hys xlli. to have excusyid hym, and it wolde not be takyn, and that I mervell of. Howbeyt he brake thus fer to my lorde; he asched hym how many he apoyntyd yow to brynge with yow, and he answerde hym xxti, and than he schewyd hym yowr charges that ye have had. My lorde seyd ye myght have men a nowe, and ther wages schal be payd for. Clopton aunswerde how that it wolde coste yow large money, besyde ther wages, to hors them and hernes them; and how that, to sey the trowthe, ye were not well at ese.
Not withstandynge all thys, my lorde wyllyd that ye schulde come to hym to Cambryge on Tuesday at nyght, with as many as ye myght, and ye and he schulde do well i now. Soo Clopton thyngyth that and ye brynge a dosen with yow, it is suffycyent; howbeyt that Syr Emonde Bedyngfeld, Syr Thomas Tyrell, and Syr Ryc. Lewes have ben with my lorde, and yche of them have offyrde to mete with my lorde at Cambryge with xxx. men a pese of them. So I wolde not ye schulde be to ferre undyr them; wherfor I thynke best that ye purvey yow so as and ye schulde goo forthe yor selfe, for I can perseve non othyr wyse.
My bedfelawe Cornwaleys is maryed in the Northe, and he came as yesternyght to my lorde streyt owt of the contre, and he scheythe [showeth] non othyr wyse but as I have wretyn here afore in thys lettyr.
Ye schall have for yor self and for yche of your servauntes horsyd and hernessyd xxs. in hande at Cambryge for a monthe, and I truste we schal have done or xx. days to an ende, with the grace of God, Who have yow in kepynge.
At Henyngham. Be your brodyr, Wylliam Paston.