[10.1] Crossed out in MS.
[10.2] Afterwards Attorney-General to Henry VII. He was Reader of Lincoln’s Inn in Lent, 18 Edward IV.
[10.3] Blank in MS.
[11.1] Blank in original.
[944]
EDMUND ALYARD TO MARGARET PASTON[11.2]
To his worshepful mastres, Mastres Margaret Paston.
1479
MARCH 4
Right worshepful mastres, I recommande me unto yow as lowly as I kan, thankyng yow for your goodnes at all tymis; God graunt me to deserve it, and do that may plese yow.
As for your son Water, his labor and lernyng hathe be, and is, yn the Faculte of Art, and is well sped there yn, and may be Bacheler at soche tyme as shall lyke yow, and then to go to lawe. I kan thynk it to his preferryng, but it is not good he know it on to the tyme he shal chaunge; and as I conceyve ther shal non have that exibeshyon to the Faculte of Lawe. Therfore meve ze the executores that at soche tyme as he shal leve it, ye may put a nother yn his place, soche as shal lyke you to prefer. If he shal go to law, and be made Bacheler of Art be fore, and ye wolle have hym hom this yere, then may he be Bacheler at Mydsomor, and be with yow yn the vacacion, and go to lawe at Mihelmas. Qwhat it shal lyke yow to commande me yn this or eny odir, ye shal have myn service redy.
I pray yow be the next masenger to send me your entent, that swech as shal be necessary may be purveyid yn seson. And Jesu preserve yow.