Date uncertain
Right trusty and welbeloved frende, I comaunde me to you. And, Ser, I tolde my maister that ye wolde have ben with him or this; for which cause he mervaileth ye kepe nat your promyse. Wherfore I avise you to come and bryng my maister his money afore this fest of Cristmasse.
And, also, ye ar yerly behynde of a boore or els ten shillinges after the price of oon bore. And where ye be owyng your boore for ij. yerys, I wolde avyse you to delyver unto Ser William Storer the seid dute, or els I counceile you to send my maister a resonable somme of money with thies boores afore Cristmasse for your thanke, consideryng his kynde dealyng, as well in sufferaunce of your money as in your owne matier.
Writen at London, the xvjth day of Decembre. Be your frende, George, servaunte to Mr. W. Paston.[41.2]
[41.1] We place this letter after the last for convenience. Its date is unimportant.
[41.2] The subscription is in a different hand from the letter itself, which is in a clerk’s hand, very well written.
[972]
JOHN, PRIOR OF BROMHOLM, TO JOHN PASTON[41.3]
To my right worchipful maister, John Paston, Sqwyer.
1480-7
Right worchipful maister, I recomaunde me un to yow, desiryng to knowe of youre welfare and prosperyte, wheche Jesu maynteyne and encreese to His pleser after youre hertys desyre, thankyng yow ever of youre good maistership to me shewed at alle tymes withoute deserte on my behalve, prayng yow, and hirtely besechyng of youre goode contynuance. Please it yowre maistership, for as moche as it [is] moved on to the my good maisters, the counsell of the Duche of Lancastr, that they be weelwillyng to make laboure on to my Sovereyn Lady the Qween at youre good instaunce for certeyn tymber toward my dortour at Bromholm, in wheche myn specyall desyre is to have viij. princypall beemys, everych on in length xj. zerds. I am not expeert in makyng of any supplicacion, besechyng youre maistership to take it uppon you to do it make after your avyce, alegged all poverte, as youre worchipfull discrecion can moche better than I can enforme; and I remitte all to youre wysdam, ever besechyng you to calle this matyer to youre remembraunce. No more at this tyme, but the Holy Trinite mote have yow in His governaunce, and sende you longe lyf to endure to His pleser.