"Miss Barton," I stammered oot, "I am come, according to your invitation, to"——
"My invitation, sir!" said Miss Barton, noo a little confused, an' blushin in her turn. "What invitation? I haena the pleasure o' ony acquaintance wi' ye, sir. Ye're a perfect stranger to me."
"I houp no a'thegither, Miss Barton," replied I, makin an abortive attempt at a captivatin smile. "I took the liberty o' addressin a letter to ye yesterday; an' here's yer invitation on the back o't," continued I, an' noo puttin her ain card into her hands. The puir lassie looked confounded, an', in great agitation, said—
"Oh, sir, it's a mistak! I'm so sorry. It's an entire mistak on my part. Yer'e no the person at a' I meant. I thocht the letter was frae anither gentleman—a different person a'thegither. It's the name has misled me. I am really so sorry." An' she curtsied politely to me, an' shut the door.
Ay, here, then, was a pretty dooncome to a' my air-built castles o' luve an' happiness! It was a mistak, was it?—a mistak? I wasna the person at a'! She thocht the letter was frae anither gentleman a'thegither! An', pray, wha was this gentleman? A' that, an' a deal mair, I subsequently fand oot. The gentleman was a certain Willie Smith—a young, guid-lookin fallow, who sat in the same kirk wi' us, an' between whom an' Lizzy there had lang existed the telegraphic correspondence o' looks an' smiles, an' sighs, an' blushes—in fact, just such a correspondence as I had carried on mysel, wi' this important difference, however, that it wasna a' on ae side, as it noo appeared it had been in my case. The other Willie Smith's returns were real, while mine were only imaginary. I needna enlarge on the subject o' my feelins under this grievous an' heart-rendin disappointment. It will be aneuch to say that it pat me nearly beside mysel, an' that it was amaist a hale week before I tasted a morsel o' food o' ony kind. I was in a sad state; but time, that cures a' ills, at length cured mine, too, although it didna remove my regret that a name so unhappily frequent as Willie Smith had ever been bestowed on me.
Havin already described mysel as bein o' a susceptible nature, and bein at this time in the prime o' youth, it winna surprise the reader to learn that I soon after this fell in love a second time. The object o' my affections, on this occasion, was a pretty girl, whom I met wi' at the house o' a mutual freen. She was a stranger in oor toun, an' had come frae Glasgow—o' which city she was a native—on a short visit to a relation. The acquaintance which I formed wi' this amiable creature soon ripened into the most ardent affection, an' I had every reason, very early, to believe that my love was returned. The subsequent progress of our intimacy established the delightful fact. We eventually stood on the footin o' avowed, an' all but absolutely betrothed lovers. Soon after this, Lucy Craig, which was the name of my beloved, returned to Glasgow, but not before we had settled to maintain a close and regular correspondence.
The correspondence wi' Lucy, to which I hae alluded, subsequently took place; an', for several months—durin which I had made, besides, twa or three runs to Glasgow, to see her—mony a sweet epistle passed between us—epistles fu' o' lowin love, an' sparklin hopes, an' joy. I may as weel here remark, too, that, on the occasions o' my visits to Lucy, I was maist cordially an' kindly received by her mother—a fine, decent, motherly body, an' a widow—Lucy's father havin died several years before. Aweel, as I said, our correspondence went on closely an' uninterruptedly; but I maun noo add, wi' a restriction as to time, an' say for aboot five months, at the end o' which time it suddenly ceased, on the pairt o' Lucy, a'thegither. She was due me a letter at the time; for I had written three close on the back o' each other, which were yet unanswered. In the greatest impatience an' uneasiness, I first waited ae week, an' then anither, an' anither, an' anither, till they ran up to aboot six, whan, unable langer to thole the misery which her seemin negligence, or it micht be something waur, had created, I determined on puttin my fit in the coach, an' gaun slap richt through mysel, to ascertain the cause o' her extraordinary silence. To this proceedin—that is, my gaun to Glasgow—I was further induced by anither circumstance. There was a mercantile hoose there, wi' which my faither had dealt for twenty years, an' which had gotten, frae first to last, mony a thoosan pounds o' his money—a' weel an' punctually paid. Noo, it happened that, twa or three days before this, my faither had dispatched an order to this house for a fresh supply o' guids, whan, to oor inexpressible amazement, we received, instead o' the guids, a letter plumply refusin ony further credit, an' demandin, under a threat o' immediate prosecution, payment o' oor current account—amountin to aboot £150. To us this was a most extraordinary affair, an' wholly inexplicable, an' we resolved to know what it meant, by personal application to the firm. This, then, was anither purpose I had to serve in gaun to Glasgow, to which I accordingly set out, wi' the folks hunner-an'-fifty pounds in my pocket.
On arrivin in the city just named, my first ca', of course, was on Lucy. But this wasna accomplished withoot a great deal o' previous painfu feelin. It was twa or three minutes before I could rap. At length I raised the knocker, an' struck. Lucy opened the door. She stared wildly at me, for a second, an' then, utterin a scream, ran into the house, exclaimin, distractedly—"O James, James! mother, mother! here's Mr. Smith's ghost!" And she screamed again more loudly than ever, an' flung herself on the sofa, in a violent fit o' hysterics.
Here, then, was a pretty reception. I was confounded, but stepped leisurely into the hoose, after Lucy, whom I found extended on the sofa, an' her mother an' a strange gentleman beside her—a stranger to me at least—endeavouring to soothe her, and calm her violence. On the mother, my presence seemed to hae nearly as extraordinary an effect as on the dochter. Whan I entered the room, she, too, set up a skirl, and fled as far back frae me as the apartment wad admit, exclaimin—
"Lord be aboot us, Mr. Smith! is that you? Can it be possible? Are ye in the body, or are ye but a wanderin spirit? Lord hae a care o' us, are ye really an' truly leevin, Mr. Smith?"