"But there is ae thing that grieves me beyond a' that I hae mentioned to ye. Ye ken my mither, puir auld body, is a widow now. She is in the seventy-sixth year o' her age, and very frail. She has naebody to look after her but me—naebody that has a natural right to do it; for I never had ony brothers, as ye ken; and, as for my twa sisters, I daresay they have just a sair aneugh fecht wi' their ain families, and as they are at a distance, I dinna ken how they are situated wi' their guidmen—though I maun say for them, they send her a stane o' oatmeal, an ounce o' tobacco, or a pickle tea and sugar, now and then, which is very likely as often as they hae it in their power; and that is a great deal mair than I'm allowed to do for her—me that has a right to protect and maintain her. A' that she has to support her is fifteenpence a-week aff the parish o' Mertoun. O Robin, man!—Robin, man!—my heart rugs within me, when I talk to you about this. A' that I hae endured is naething to it! To see my puir auld mither in a state o' starvation, and no to be allowed to gie her a saxpence! O Robin, man!—Robin, man!—is it no awfu'? When she was first left destitute, and a widow, I tried to break the maiter to Tibby, and to reason wi' her.
"'O Tibby, woman!' said I, 'I'm very distressed. Here's my faither laid in the grave, and I dinna see what's to come o' my mither, puir body—she is auld, and she is frail—she has naebody to look after or provide for her but me.'
"'You!' cried Tibby—'you! I wush ye wad mind what ye are talkin about! Ye have as many dougs, I can tell ye, as ye hae banes to pike! Let your mither do as ither widows hae done afore her—let the parish look after her.'
"'O Tibby, woman!' said I; 'but if ye'll only consider—the parish money is very sma', and, puir body, it will mak her heart sair to receive a penny o't; for she weel kens that my faither would rather hae dee'd in a ditch than been behauden to either a parish or an individual for a saxpence.'
"'An' meikle they hae made by their pride,' said Tibby. 'I wush ye wud haud your tongue.'
"'Ay, but Tibby,' says I, for I was nettled mair than I durst show it, 'but she has been a guid mother to me, and ye ken yoursel that she's no been an ill guid-mother to ye. She never stood in the way o' you an' me comin thegither, though I was paying six shillings a-week into the house.'
"'And what am I obliged to her for that?' interrupted my Jezebel.
"'I dinna ken, Tibby,' says I; 'but it's a hard thing for a son to see a mother in want, when he can assist her. Now, it isna meikle she takes—she never was used wi' dainties; and, if I may just tak her hame, little will serve her, and her meat will ne'er be missed.'
"'Ye born idiot!' cried Tibby. 'I aye thought ye a fule—but ye are warse than a fule! Bring your mither here! An auld, crossgrained, faut-finding wife, that I ne'er could hae patience to endure for ten minutes in my days! Bring her here, say ye! No! while I live in this house, I'll let ye ken that I'll be mistress.'
"Ay, and maister too, thought I. I found it was o' nae use to argue wi' her. There was nae possibility o' gettin my mither into the house; and as to assisting her wi' a shillin or twa at a time by chance, or paying her house rent, or sending her a load o' coals, it was perfectly out o' the question, and beyond my power. Frae the nicht that I went to Orange Lane to this moment, I hae never had a saxpence under my thumb that I could ca' my ain. Indeed, I never hae money in my hands, unless it be on a day like this, when I hae to gang to a fair, or the like o' that; and even then, before I start, her leddyship sees every bowie, bicker, and piggin, that gangs into the cart—she kens the price o' them as weel as I do; and if I shouldna bring hame either money or goods according to her valuation, I actually believe she wad murder me. There is nae cheatin her. It is by mere chance that, having had a guid market, I've outreached her the day by a shillin or twa; and ane o' them I'll spend wi' you, Robin, and the rest shall gang to my mither. O man! ye may bless your stars that ye dinna ken what it is to hae a termagant wife."