Weel, sir, I was like the lave—I likit Geordie, and Geordie likit me, and we were aye thegither. It garred my vera heart loup to hear him spin yarns, as he ca'd it, about the dangers he had escapit, and the unco sichts he had seen; till, frae less to mair, I felt an eager wish to gang wi' him on his neist voyage, and to witness the wonders o' the deep, and to veesit forran lands. Besides, I saw that a' the lassies thocht mair o'ane who had been leading a life o' danger and hardship, than o' the douce lads wha keepit following the pleuch, or thumping wi' the flail a' the days o' their lives. And I thocht that my ain wee Joe wad lo'e me better, and that I micht earn something to mak us comfortable; and that, after I had seen a' the ferlies o' forran lans, I wad come hame laden wi' braws to mak her my wife. Bonny wee thing! I wonder if she minds me yet! In storm, in darkness, in danger, I never forgot her.
Sair did my mither greet when I tell't her I was for awa wi' Geordie; and aft, aft did she beg me to change my min'.
"Stay at hame, Tam, my bairn," said she, "and tak care o' yer auld mither. A' the lave are gane but yersel, and if ye gang too, what'll become o' us!" But I wadna be persuaded; the spirit o' change was upon me, and gang I wad.
"I winna hinder ye, my bairn," said my faither; "if yer min' is made up to gang for a sailor, gang, and His blessing gang wi' ye. Ye'll be as safe in the midst o' the raging sea as ye wad be by yer ain fireside, as lang's ye trust in Him."
But the warst was to come. I maist repented o' my determination when I gaed for the last time to the trysting tree, whar I had sae aft met my dear lassie. She was there, wi' her face buried in her hans, sabbing as if her young heart would break. Oh, sir, it was a sad sicht to me!
It was a bonny nicht: the moon was at the full, and the stars were a' glinting roun' her; there wasna a cloud, but on our ain hearts; the hail holm was ae bleeze o' licht, amaist as licht as day; the leaves were just soughing o'er our heads; and the soun' o' the burn wimpling near us cam clear upon our ears. Our hearts were owre sair for muckle speaking; she sabbit, and I tried to comfort her—but a' in vain. I wanted comfort mysel; and at last I could stan' it nae langer—I just grat in company.
But this couldna last for lang. We vowed to be leal to ilk ither; and, wi' ae last kiss, I forced mysel awa.
Neist morn, Geordie Gordon and I took foot in han' and awa to Leith, and frae that worked our passage to Lunnon. Weel, sir, it's an awsome bit that Lunnon! The streets just like hedgeraws, and the kirk steeples like poplar-trees; and then the folk as thrang on the planestanes on a week-day as if a' the kirks were scaling at ance! Ye'll hae been in Lunnon, I'se warran, sir? Min', I'm just telling ye hoo I thocht and felt then, for I ken better sin' syne. Then the ships a' crooding on ane anither, like sheep in a fauld, their masts as thick as the trees in yon wud: and the muckle barges wi' but ae man to guide them; and the wee bit cockleshells o' wherries skimming alang, loaded wi' passengers sitting amaist upon the water; and the noise o' men, and the thunner o' carriages, and the smoke o' ten thousand chimlas! 'Od, sir, I used to think Car'il a grand toun, but it's naething ava to Lunnon.
Weel, sir, ae day, Geordie and me were walkin on a place they ca' Tower Hill—whar there's a grand auld castle they ca' the Tower o' Lunnon, where they say a sodger chiel, o' the name o' Julius Cæsar, was beheadit langsyne, in the time o' ane o' our auld Scottish kings—when a weel-faured, sonsy-looking chiel, dressed like a provost, wi' a hat on his head might serve a duke, cam up till us, and seeing us glowering aboot, and just doing naething ava, began colloquying wi' us.
"It's a fine day, my lads," said he, looking as blithe as the sun in a May morning. "You seem to be strangers in London. I like your honest looks; and, as I am an idler myself, I will go with you, if you like, and show you the lions."