"'Perhaps I could, dear,' said I; 'but ye ken true love is aye blate; however, if ye hae nae objections, I'll gang yont, after fothering time the micht, and speak to yer faither and mither; and if they hae nae objections, and ye have yer providin' ready, wi' yer guid-will and consent, I shall gie up oor names, and we shall be cried on Sabbath first.'
"'Oh,' said she, 'I haena lived for five-and-twenty years without expectin' to get a guidman some day; and I hae had my providin' ready since I was eighteen, an' a' o' my ain spinnin' and bleachin', an' the lint bocht wi' what I had wrocht for; so that I am behauden to naebody. My faither and mither have mair sense than to cast ony obstacle in the way o' my weelfare; and, as ye are far frae bein' disagreeable to me, if we are to be married, it may as weel be sune as syne, and we may be cried on Sunday if ye think proper.'
"'O Kirsty, woman!" cried I, and I drew my arm round her waist again, 'ye hae made me as happy as a prince! I hardly ken which end o' me is upmost!'
"'Na, Willie,' said she, 'there is nae necessity for ony nonsensical raptures, ye ken perfectly weel that yer head is upmost, though I hae heard my faither talk about some idiots that he ca's philosophers, who say that the world whirls roond aboot like a cart-wheel on an axle-tree, and that ance in every twenty-four hours our feet are upmost, and our head downmost; but it will be lang or onybody get me to believe in sic balderdash! As to yer being happy at present, it shall be nae faut o' mine if ye are not aye sae; and if ye be aye as I would wish ye to be, ye will never be unhappy.'
"Such, as near as I can recollect, is not only the history, but the exact words o' oor courtship. Her faither and mither gied their consent without the slightest hesitation. I remember her faither's words to me were—'Weel, William, frae a' that I hae seen o' ye, ye appear to be a very steady and industrious young man, and ane that is likely to do weel in the world. I hae seen, also, wi' great satisfaction, that ye are very regular in yer attendance upon the ordinances; there hasna been a Sabbath, since ye cam to be oor neebor, that I hae missed ye oot o' yer seat in the kirk. Frae a' that I hae heard concernin' ye, also, ye hae always been a serious, sober, and weel-behaved young man. These things are a great satisfaction to a faither when he finds them in the lad that his dochter wishes to marry. Ye hae my consent to tak Kirsty; and, though I say it, I believe ye will find her to mak as industrious, carefu', and kind a wife, as ye would hae found if ye had sought through a' broad Scotland for ane. I will say it, however, and before her face, that there are some things in which she takes it o' her mother, and in which she will hae her ain way. But this is her only faut. I'm sure ye'll ne'er hae cause to complain o' her wasting a bawbee, or o' her allowing even the heel o' a kebbuck to gang to unuse. It is needless for me to say mair; but ye hae my full and free consent to marry when ye like.'
"Then up spoke the auld guidwife, and said—'Weel, Willie, lad, if you and Kirsty hae made up yer minds to mak a bargain o' it, I am as little disposed to oppose yer inclinations as her faither is. A guid wife, I sincerely believe, ye will find her prove to ye; and though her faither says that in some things she will be like me, and have her ain way, let me tell ye, lad, that is owre often necessary for a woman to do, wha is striving everything in her power for the guid o' her husband and the family, and sees him, just through foolishness, as it were, striving against her. Ye are strange beings you men-folk to deal wi'. But ye winna find her a bare bride, for she has a kist fu' o' linen o' her ain spinnin', that may serve ye a' yer days, and even when ye are dead, though ye should live for sixty years.'
"I thought it rather untimeous that the auld woman should hae spoken aboot linen for oor grave-claes, before we were married; and I suppose my countenance had hinted as much, for Kirsty seemed to hae observed it, and she said—'My mother says what is and ought to be. It is aye best to be provided for whatever may come; and as Death often gies nae warning, I wadna like to be met wi' it, and to hae naething in the house to lay me out in like a Christian.'
"I thought there was a vast deal o' sense and discretion in what she said; and though I didna like the idea o' such a premature providing o' winding-sheets, yet, after she spoke, I highly approved o' her prudence and forethought.
"It was on a Monday afternoon, about three weeks after the time I have been speaking o', that Kirsty, wi' her faither, and mother, and another young lass, an acquaintance o' hers, that was to be best-maid, cam yont to my house for her and me to be married. I had sent for ane o' my brothers to be best-man, and he was with me waiting when they came. She was not in the least discomposed, but behaved very modestly. In a few minutes the minister arrived, when the ceremony immediately began, and within a quarter of an hour she was mine, and I was hers, for the term o' oor natural lives.
"From the time that I took the farm, I had no kind o' dishes in the house, save a wooden bowie or twa, four trenchers, three piggins, and twa bits o' tin cans, that I had bought from a travelling tinker for twopence a-piece, and which Kirsty afterwards told me, were each a halfpenny a-piece aboon their value. I dinna think that I had tasted tea aboon a dozen times in the whole course o' my life; but, as it was coming into general use, I thought it would look respectfu' to my bride, before her faither and mother, if I should hae tea upon oor marriage day, and I could ask the minister to stop and tak a dish wi' us. I thought it would gie a character o' respectability to oor wedding. Therefore, on the Saturday afore the marriage, I went to Dumfries, and bought half a dozen o' bonny blue cups and saucers. I never durst tell Kirsty how meikle I gied for them. It was with great difficulty that I got them carried hame without breaking. I also bought two ounces o' the best tea, and a whole pound o' brown sugar.