"There maun be nae patience, when God says haste."
"Canny, canny. The wa's are thin and ears are gleg. I can hear a whisper frae the next room. Now, I'll spin and you'll speak."
And so she began to produce the dirl by turning the wheel and plying the thread.
"What although ye hae seen him? that maks nae difference. Your aith is still afore the Lord; and though we are forbidden to swear, when we hae sworn we hae nae right to brak that aith, as if it were a silly wand, to be broken and cast awa' at the end o' our journey. And then ye maun keep in mind, if you brak your word, ye stretch his neck."
"I carena," replied Christian. "The Lord maun hae His ain for reward, and Satan maun hae his ain, too, for punishment. Sin' ever that eery night when in my night-shirt I followed George into the house, and saw what I saw, the Spirit o' the Lord has been busy in my heart; and my aith has been to me nae mair than a windlestrae in the east wind, to be blawn awa' where it listeth. Ye are, like mysel', o' the Auld Light, and ken what it is to hae the finger o' command laid upon ye."
"We maun obey; but we maun ken whether the finger is for the will o' the auld rebel o' pride, wha rebelled in heaven, or Him wha says to the murderer, Get ye among the rocks or caves o' secrecy, and I will search ye out, and rug ye into the licht."
"And what for should I no ken whase finger it is?" said wife Christian. "Have I no seen what I have seen? For what are a' thae things keepit, as man keeps the apple o' his e'e? Is na the rust and the worm, ay, and Time's teeth, aye eating, and gnawing, and tearing, so that everything passes awa' to make room for others, as if the hail warld were a whirligig turning round like your ain wheel there for ever and ever?"
"Ay, the Lord's hand, na doubt. The deil doesna keep the instruments and signs o' his evil, but shuffles them awa' in nooks and corners to be out o' the een o' his victims."
"But hae I no laid my very hand on the fleshless head o' the bonny misguided creature? Wae tak the man wha brought sae muckle beauty to the earth to rot, and yet hae nae grave to cover it!"
"Weel mind I o' her," said Ann, as she still made the wheel go round. "How she sailed up the Wynd wi' her load o' silks and satins, and the ribbons that waved in the wind, as if to say, Look here; saw ye ever the like among the daughters o' men?"