I assured him that I would neither disturb the young lady’s slumber, nor Jamie Fleep’s, and begged him to give me as much information as he could about this castle.
“Weel, wishin’ your gude health again.—Our minister ance said, that Soloman’s Temple was a’ in ruins, wi’ whin bushes, an’ broom an’ thristles growin’ ower the bonny carved wark an’ the cedar wa’s, just like our ain Abbey. Noo, I judge that the Abbey o’ Deer was just the marrow o’t, or the minister wadna hae said that. But when it was biggit, Lord kens, for I dinna. It was just as you see it, lang afore your honour was born; an’ aiblins, as the by-word says, may be sae after ye’re hanged. But that’s neither here nor there. The Cummins o’ Buchan were a dour and surly race; and, for a fearfu’ time, nane near han’ nor far awa could ding them, an’ yet mony a ane tried it. The fouk on their ain lan’ likit them weel enough; but the Crawfords, an’ the Grahames, an’ the Mars, an’ the Lovats, were aye trying to comb them against the hair, an’ mony a weary kempin’ had they wi’ them; but, some way or ither, they could never ding them; an’ fouk said that they gaed and learned the black art frae the Pope o’ Room, wha, I mysel heard the minister say, had aye a colleague wi’ the Auld Chiel. I dinna ken fou it was; in the tail o’ the day, the hale country rase up against them, an’ besieged them in the Abbey o’ Deer. Ye’ll see, my frien’ [by this time mine host considered me as one of his cronies], tho’ we ca’ it the Abbey, it had naething to do wi’ Papistry; na, na, no sae bad as a’ that either, but just a noble’s castle, where they keepit sodgers gaun about in airn an’ scarlet, wi’ their swords an’ guns, an’ begnets, an’ sentry-boxes, like the local militia in the barracks o’ Aberdeen.
“Weel, ye see, they surrounded the castle, an’ lang did they besiege it; but there was a vast o’ meat in the castle, an’ the Buchan fouk fought like the vera deil. They took their horse through a miscellaneous passage, half a mile long, aneath the hill o’ Saplinbrae, an’ watered them in the burn o’ Pulmer. But a’ wadna do; they took the castle at last, and a terrible slaughter they made amo’ them; but they were sair disappointed in ae partic’ler, for Cummin’s fouk sank a’ their goud an’ siller in a draw-wall, an’ syne filled it up wi’ stanes. They gat naething in the way of spulzie to speak o’; sae out o’ spite they dang doon the castle, an’ it’s never been biggit to this day. But the Cummins were no sae bad as the Lairds o’ Federat, after a’.”
“And who were these Federats?” I inquired.
“The Lairds o’ Federat?” said he, moistening his mouth again as a preamble to his oration. “Troth, frae their deeds, ane would maist think that they had a drap o’ the deil’s blude, like the pyets. Gin a’ tales be true, they hae the warmest place at his bink this vera minute. I dinna ken vera muckle about them, though, but the auldest fouk said they were just byous wi’ cruelty. Mony a gude man did they hing up i’ their ha’, just for their ain sport; ye’ll see the ring to the fore yet in the roof o’t. Did ye ever hear o’ Mauns’ Stane, neebour?”
“Mauns’ what?” said I.
“Ou, Mauns’ Stane. But it’s no likely. Ye see it was just a queer clump o’ a roun’-about heathen, waghtin’ maybe twa tons or thereby. It wasna like ony o’ the stanes in our countra, an’ it was as roun’ as a fit-ba’; I’m sure it wad ding Professor Couplan himsel to tell what way it cam there. Noo, fouk aye thought there was something uncanny about it, an’ some gaed the length o’ saying, that the deil used to bake ginshbread upon’t; and, as sure as ye’re sitting there, frien’, there was knuckle-marks upon’t, for my ain father has seen them as aften as I have taes an’ fingers. Aweel, ye see, Mauns Crawford, the last o’ the Lairds o’ Federat, an’ the deil had coost out (maybe because the Laird was just as wicked an’ as clever as he was himsel), an’ ye perceive the evil ane wantit to play him a trick. Noo, Mauns Crawford was ae day lookin’ ower his castle wa’, and he saw a stalwart carl, in black claes, ridin’ up the loanin’. He stopped at this chuckie o’ a stane, an’, loutin’ himsel, he took it up in his arms, and lifted it three times to his saddle-bow, an’ syne he rade awa out o’ sight, never comin’ near the castle, as Mauns thought he would hae done. ‘Noo,’ says the baron till himsel, says he, ‘I didna think that there was ony ane in a’ the land that could hae played sic a ploy; but deil fetch me if I dinna lift it as weel as he did.’ Sae aff he gaed, for there was na sic a man for birr in a’ the countra, an’ he kent it as weel, for he never met wi’ his match. Weel, he tried, and tugged, and better than tugged at the stane, but he coudna mudge it ava; an’, when he looked about, he saw a man at his elbuck, a’ smeared wi’ smiddy-coom, snightern’ an’ laughin’ at him. The Laird d——d him, an’ bade him lift it, whilk he did as gin’t had been a little pinnin. The Laird was like to burst wi’ rage at being fickled by sic a hag-ma-hush carle, and he took to the stane in a fury, and lifted it till his knee; but the weight o’t amaist ground his banes to smash. He held the stane till his een-strings crackit, when he was as blin’ as a moudiwort. He was blin’ till the day o’ his death,—that’s to say, if ever he died, for there were queer sayings about it—vera queer! vera queer! The stane was ca’d Mauns’ Stane ever after; an’ it was no thought that canny to be near it after gloaming; for what says the psalm—hem!—I mean the sang—
’Tween Ennetbutts an’ Mauns’ Stane
Ilka night there walks ane.
“There never was a chief of the family after; the men were scattered, an’ the castle demolished. The doo and the hoodie craw nestle i’ their towers, and the hare maks her form on their grassy hearthstane.”