For weel I ken that the mune's his ain
And he is the maister there;
A' nicht he's lauchin', for, fegs, there's nane
To draw the blind on his windy-pane
And tak' an' bed him, to lie his lane
And pleasure himsel' nae mair.
III
Says I to Grannie, "Keek up the glen
Abune by the rodden tree,
There's a braw lad 'yont i' the mune, ye ken."
Says she, "Awa' wi' ye, bairn, gang ben,
For noo it's little I fash wi' men
An' it's less that they fash wi' me!"
IV
When I'm as big as the tinkler-man
That sings i' the loan a' day,
I'll bide wi' him i' the tinkler-van
Wi' a wee-bit pot an' a wee-bit pan;
But I'll no tell Grannie my bonnie plan,
For I dinna ken what she'll say.
V
And, nicht by nicht, we will a' convene
And we'll be a cantie three;
We'll lauch an' crack i' the loanin' green,
The kindest billies that ever was seen,
The tinkler-man wi' his twinklin' een
And the lad i' the mune an' me!
THE GOWK
I see the Gowk an' the Gowk sees me
Beside a berry-bush by the aipple-tree.
Old Scots Rhyme.
'Tib, my auntie's a deil to wark,
Has me risin' 'afore the sun;
Aince her heid is abune her sark
Then the clash o' her tongue's begun!
Warslin', steerin' wi' hens an' swine,
Naucht kens she o' a freend o' mine—
But the Gowk that bides i' the woods o' Dun
He kens him fine!