"Will ye gang wi' me and fare
To the bush aboon Traquair?
Owre the high Minchmuir we'll up and awa',
This bonny simmer noon,
While the sun shines fair aboon,
And the licht sklents saftly doun on holm and ha'.
"And what would you do there,
At the bush aboon Traquair?
A lang dreich road, ye had better let it be;
Save some auld skrunts o' birk
I' the hillside lirk,
There's nocht i' the warld for man to see.
"But the blithe lilt o' that air,
'The Bush aboon Traquair,'
I need nae mair, it's eneuch for me;
Owre my cradle its sweet chime,
Cam' soughin' frae auld time,
Sae tide what may, I'll awa' and see.
"And what saw ye there
At the bush aboon Traquair?
Or what did ye hear that was worth your heed?
I heard the cushies croon
Thro' the gowden afternoon
And the Quair burn singing doun to the Vale o' Tweed.
"And birks saw I three or four,
Wi' grey moss bearded owre,—
The last that are left o' the birken shaw,
Whar mony a simmer e'en
Fond lovers did convene,
Thae bonny, bonny gloamins that are lang awa'.
"Frae mony a but and ben,
By muirland, holm, and glen,
They cam' ane hour to spen' on the greenwood swaird;
But lang hae lad an' lass I
Been lying 'neth the grass,
The green, green grass o' Traquair kirkyard.
"They were blest beyond compare,
When they held their trysting there,
Among thae greenest hills shone on by the sun;
And then they wan a rest,
The lownest and the best,
I' Traquair kirkyard when a' was dune.
"Now the birks to dust may rot,
Names o' lovers be forgot,
Nae lads and lasses there ony mair convene;
But the blithe lilt o' yon air
Keeps the bush aboon Traquair,
And the love that ance was there, aye fresh and green."