Primaque pars huius thalamis aliena reperta est,
Nam mihi sic coniunx sancta Dialis ait;
‘Donec ab Iliaca placidus purgamina Vesta
Detulerit flavis in mare Thybris aquis,
Non mihi detonsos crines depectere buxo,
Non ungues ferro subsecuisse licet,
Non tetigisse virum, quamvis Iovis ille sacerdos,
Quamvis perpetua sit mihi lege datus.
Tu quoque ne propera. Melius tua filia nubet
Ignea cum pura Vesta nitebit humo.’