“I will tell ye,” said Jenny. “I jaloused his keeping his face frae us, and speaking wi’ a madelike voice, sae I e’en tried him wi’ some tales o lang syne; and when I spake o’ the brose, ye ken, he didna just laugh,—he’s ower grave for that nowadays, but he gae a gledge wi’ his ee that I kend he took up what I said. And a’ his distress is about Miss Edith’s marriage; and I ne’er saw a man mair taen down wi’ true love in my days,—I might say man or woman, only I mind how ill Miss Edith was when she first gat word that him and you (ye muckle graceless loon) were coming against Tillietudlem wi’ the rebels.—But what’s the matter wi’ the man now?”
“What’s the matter wi’ me indeed!” said Cuddie, who was again hastily putting on some of the garments he had stripped himself of; “am I no gaun up this instant to see my maister?”
“Atweel, Cuddie, ye are gaun nae sic gate,” said Jenny, coolly and resolutely.
“The deil’s in the wife!” said Cuddie. “D ’ye think I am to be John Tamson’s man, and maistered by women a’ the days o’ my life?”
“And whase man wad ye be? And wha wad ye hae to maister ye but me, Cuddie, lad?” answered Jenny. “I’ll gar ye comprehend in the making of a hay-band. Naebody kens that this young gentleman is living but oursells; and frae that he keeps himsell up sae close, I am judging that he’s purposing, if he fand Miss Edith either married, or just gaun to be married, he wad just slide awa easy, and gie them nae mair trouble. But if Miss Edith kend that he was living, and if she were standing before the very minister wi’ Lord Evandale when it was tauld to her, I’se warrant she wad say No when she suld say Yes.”
“Weel,” replied Cuddie, “and what’s my business wi’ that? If Miss Edith likes her auld joe better than her new ane, what for suld she no be free to change her mind like other folk? Ye ken, Jenny, Halliday aye threeps he had a promise frae yoursell.”
“Halliday’s a liar, and ye’re naething but a gomeril to hearken till him, Cuddie. And then for this leddy’s choice, lack-a-day! ye may be sure a’ the gowd Mr. Morton has is on the outside o’ his coat; and how can he keep Leddy Margaret and the young leddy?”
“Isna there Milnwood?” said Cuddie. “Nae doubt the auld laird left his housekeeper the liferent, as he heard nought o’ his nephew; but it’s but speaking the auld wife fair, and they may a’ live brawly thegither, Leddy Margaret and a’.”
“Rout tout, lad,” replied Jenny; “ye ken them little to think leddies o’ their rank wad set up house wi’ auld Ailie Wilson, when they’re maist ower proud to take favours frae Lord Evandale himsell. Na, na, they maun follow the camp, if she tak Morton.”
“That wad sort ill wi’ the auld leddy, to be sure,” said Cuddie; “she wad hardly win ower a lang day in the baggage-wain.”