'Suffer! Good heaven! Why, where is he?'
'Eh, Lord's sake! d'ye no ken? The poor Hieland body, Dugald Mahony, cam here a while syne, wi' ane o' his arms cuttit off, and a sair clour in the head—ye'll mind Dugald, he carried aye an axe on his shouther—and he cam here just begging, as I may say, for something to eat. Aweel, he tauld us the Chief, as they ca'd him (but I aye ca' him the Colonel), and Ensign Maccombich, that ye mind weel, were ta'en somewhere beside the English border, when it was sae dark that his folk never missed him till it was ower late, and they were like to gang clean daft. And he said that little Callum Beg (he was a bauld mischievous callant that) and your honour were killed that same night in the tuilzie, and mony mae braw men. But he grat when he spak o' the Colonel, ye never saw the like. And now the word gangs the Colonel is to be tried, and to suffer wi' them that were ta'en at Carlisle.'
'And his sister?'
'Ay, that they ca'd the Lady Flora—weel, she's away up to Carlisle to him, and lives wi' some grand Papist lady thereabouts to be near him.'
'And,' said Edward,'the other young lady?'
'Whilk other? I ken only of ae sister the Colonel had.'
'I mean Miss Bradwardine,' said Edward.
'Ou, ay; the laird's daughter' said his landlady. 'She was a very bonny lassie, poor thing, but far shyer than Lady Flora.'
'Where is she, for God's sake?'
'Ou, wha kens where ony o' them is now? puir things, they're sair ta'en doun for their white cockades and their white roses; but she gaed north to her father's in Perthshire, when the government troops cam back to Edinbro'. There was some prettymen amang them, and ane Major Whacker was quartered on me, a very ceevil gentleman,—but O, Mr. Waverley, he was naething sae weel fa'rd as the puir Colonel.'