Rodrigo Manzorro, VII testigo.
Rodrigo Manzorro, veçino de la villa de Santiago, testigo rescibido en la dicha razon, juró segund derecho, e por el juramento que hizo dixo, seyendo preguntado por la primera pregunta del dicho ynterrogatorio, que conosce todas las personas en la dicha pregunta contenidas e que los conosce de veinte años a esta parte a los unos e a los otros.
Preguntado por las preguntas generales dixo que es de hedad de quarenta años, poco mas o menos, que no es pariente de ninguna de las partes, etc.
A la segunda pregunta dixo, que puede aver catorze años, poco mas o menos, que este testigo estando en este pueblo vyo venyr a esta villa de Santo Domyngo, que a la sazon estaba de la otra parte del Rio, al dicho don Christoval Colon, e que dezia que venya de descobrir a Paria e la Trenydad, e que traya perlas de la dicha parte de Paria, e questo lo oyo dezir a las personas que con el venyan, algunos de los quales, que son Christoval de Barros e Bernaldo de Ybarra e otras muchas personas de los que venyan en los navyos el dicho viage, e lo al contenydo en la dicha pregunta dixo que no lo save.
A la tercera pregunta dixo, que no lo save, salvo que oyo dezir a Pero Alonso Nyño e a Christoval Guerra, que llevaron perlas despues quel dicho almyrante las llevó, e que despues partieron a Galizia con ellas.
A la quarta pregunta dixo, que este testigo vido venyr a los dichos Juan de la Cosa e Alonso de Hojeda de descobrir, e que aportaron a Veragua avra treze años, poco mas o menos, e que les oyó dezir que avyan descubierto en la costa de tierra firme mucha cantidad de perlas, e que no se acuerdan hasta dónde dixeron que descubrieron, e que oyó dezir quel dicho Alonso de Hojeda hizo una fortaleza en el fin de donde descobrieron, e que no la pudieron sosthener y la dexaron, e questo oyó dezir a los suso dichos, e que oyó dezir que antes desto el dicho almyrante no avya tocado en la dicha tierra, e que ansymysmo oyó dezir que los avya despachado a los suso dichos el dicho señor obispo don Juan de Fonseca.
A la quinta pregunta dixo, que oyó dezir al dicho Rodrigo de Bastidas e a Juan de la Cosa, e a Francisco de Çavallos, que avyan llegado adelante de Uravá mas que otro alguno treynta leguas, e que hasta entonces no avya llegado otra persona hasta ally.
A la sesta pregunta dixo, que oyó dezir lo contenydo en la dicha pregunta al dicho Vicente Añez e a otras personas.
A la setena pregunta dixo, que oyó dezir lo contenydo a muchos maryneros que no se acuerda de sus nonbres.
A la otava pregunta dixo, que puede aver doze años, poco mas o menos, que este testigo vio como vyno junto a este puerto el dicho almyrante don Christoval Colon y el Adelantado su hermano, o quel Comendador Mayor no lo dexó entrar aquy, e que oyó dezir que fue a Veragua e estovo ally hasta que perdio una nao y despues tornó a Jamayca e estovo ally. Preguntado a quien lo oyó dezir, dixo que porque lo vydo llegar a este puerto e porques publico e notorio y lo oyó dezir a muchos de los que con el venyan.