A la segunda pregunta dixo, que lo oyó dezir a muchas personas segund que en la dicha pregunta se contiene, asy a Vicente Yañez como a otros muchos marineros e pilotos.
A la tercera pregunta dixo, que al tienpo quel dicho señor Almirante don Cristobal Colon veniase a esta ysla con los diez e syete navios, queste testigo vino con el en el dicho viaje e vido que descubrio las yslas contenidas en esta pregunta e questuvo en la ysla de San Juan e Marigalante e en Guadalupe.
A la quarta pregunta dixo, que lo sabe como en ella se contiene, porque este testigo fue con el dicho Almirante al tienpo que descubrio las dichas yslas contenidas en esta pregunta.
A la quinta pregunta dixo, que lo a oydo dezir como en la dicha pregunta se contiene a muchas personas que fueron con el dicho Almirante a la tierra firme.
A la sesta pregunta dixo, que lo a oydo dezir como en la dicha pregunta se contiene, pero que este testigo no lo vido porque a la sazon estava en Granada en los Reynos de Castilla.
A la syete pregunta dixo, que lo oyó como en la dicha pregunta se contiene, e que asy mismo oyó dezir que los marineros con quien venia el dicho Almirante le querian echar a la mar porque no fallava tierra.
A la ocho pregunta dixo, que oyó dezir lo contenido en la dicha pregunta a muchos marineros e pilotos que fueron con el dicho Almirante en el dicho viaje, pero que este testigo no lo sabe.
A la novena pregunta dixo, que estando este testigo en la cibdad de Sevilla al tienpo que partio Cristoval Guerra para yr a tierra firme, que vido como fueron con el algunos marineros que dezian que avian ydo con el dicho Almirante e pilotos e maestres, é que despues que descubrio el dicho Cristoval Guerra oyó dezir a los dichos pilotos e marineros que avya ydo por la derrota del dicho Almirante e por sus posadas.
A las diez preguntas dixo, que lo a oydo dezir como en la dicha pregunta se contiene a muchas personas de que no se acuerda, pero que este testigo no lo sabe.
A las honze preguntas dixo, questo es lo que sabe deste caso por el juramento que hizo e firmolo de su nonbre.—El bachiller Alcocer.—Francisco Tostado.—Diego Gutierrez.—Carlos de Hontiveros.