A la sesta pregunta dixo, que en el dicho tiempo que este testigo estava en la Española, cuando la vinieron á poblar, dende en quatro años poco mas ó menos, aviendo ydo á Castilla el dicho don Cristoval Colon á llevar cierta muestra de oro á sus Altezas, volvio á estas partes, é quando vino á la dicha Española, que llegó alli, dixeron el y la gente que alli venian con el que abian tocado en la Tierra firme en la provincia de Paria, é que vido este testigo perlas que trayan é dezian averlas avido en la dicha provincia de Paria, é questo es lo que sabe de lo contenido en la dicha pregunta.
A la octava pregunta dixo, que cree é á oydo dezir á muchas personas que si no fuera por la yndustria del dicho Almirante, que no fuera tan presto descubiertas las dichas yndias, porque antes que se descubriesen oyó dezir este testigo á muchas personas que partiendo de Castilla fasya el hueste que no se podia hallar tierra.
A la novena pregunta dixo, que cree é á oydo dezir á muchas personas que por el principio quel dicho Almirante hizo en el descubrir en estas partes se siguieron otros descobridores que despues vinieron, é que cree que se guiaron por lo que descubrio é abia platicado muchas vezes el dicho Almirante, porque este testigo le oyo fablar al dicha Almirante muchas vezes que á la parte del sur avia una navegacion de tierras muy ricas, é que por esto cree que se guyaron los que despues fueron.
A la dezena pregunta dixo, que Juan de la Cosa vino con el dicho Almirante quando vino á poblar á la Española, é le vido platicar con el dicho Almirante al dicho Juan de la Cosa muchas cosas de lo por descobrir, é que despues oyo dezir á muchas personas quel dicho Juan de la Cosa abia ydo á descobrir por la tierra de Paria, tocando en lo descubierto, é por la costa adelante.
A las diez y seys preguntas dixo, que dize lo que dicho tiene, é que en ello se afirma, é que aquesto es la verdad para el juramento que hizo, é por no saber escrevir lo señaló de su señal.
Juan Gil, III testigo.
Juan Gil, vezyno desta villa de San German desta ysla de San Juan, testigo presentado.
A la primera pregunta dixo, que conosce al dicho Almirante don Diego Colon, é que le conosce desde quinze años á esta parte poco mas ó menos, é que al promotor fiscal de su Alteza que no lo conosce.
A la segunda pregunta dixo, que á oydo dezir lo contenido en la dicha pregunta, á Juan de la Cosa é á muchas personas que le dixeron aberse hallado en ello, de las quales personas no se acuerda, lo qual oyo dezir en la ysla Española puede aver quinze años.