A la quarta pregunta dixo, que la sabe como en ella se contiene, por queste testigo se halló, como dicho tiene, en el segundo viage con el dicho Almirante quando descubrió las dichas yslas contenidas en la dicha pregunta.
A la quinta pregunta dixo, que á oydo dezir lo contenido en la dicha pregunta á Juan Altamirano é á otras personas que dixeron averse hallado en las dichas provincias contenidas en la dicha pregunta, é que dezian ser todas en una tierra que se dize tierra firme.
A la sesta pregunta dixo, que á oydo dezir lo contenido en la pregunta muchas vezes á muchas personas cuyos nonbres no se acuerda.
A la setena pregunta dixo, que lo que dello sabe es que este testigo antes que los descobridores contenidos en la dicha pregunta fuesen á descobrir oyo dezir quel dicho Almirante abia descubierto la provincia de Paria, é que despues oyo dezir que los sobre dichos se pusyeron en yr á descobrir, pero que no sabe sy fueron primero á la provincia de Paria ó no.
A la otava pregunta dixo, que lo que dello sabe es que antes quel dicho Almirante viniese á descobrir en estas partes oyo dezir machas vezes este testigo á personas cuyos nonbres no se acuerda que hasya estas partes no abia tierra ninguna, é que despues quel dicho Almirante bolvió de descobrir oyo dezir que que algunos pilotos é marineros se avian puesto con el dicho Almirante en quererse volver, porque desyan que los llevava perdidos.
A la novena pregunta dixo, que lo que dello sabe es quel dicho Almirante avia mostrado á hacer cartas de marear á Juan de la Cosa é le dezia muchas cosas de las destas partes, é que cree que por la yndustria del dicho Almirante asy el dicho Juan de la Cosa, como los otros que fueron á descobrir despues del dicho Almirante, se pusyeron en yr á descobrir, é que lo cree por lo que dicho tiene.
A la dezena pregunta dixo, que dize lo que dicho tiene en la novena pregunta.
A las treze preguntas dixo, que á oydo dezir á Alonso de Cea, que se halló en todo lo contenido en la dicha pregunta, pero que este testigo no lo sabe.
A las diez é seys preguntas dixo, que dize lo que dicho tiene é que en ello se afirma, é questa es la verdad so cargo del juramento que fizo é firmolo de su nombre.—Juan Ceron.