A la primera pregunta dixo, que conosce al dicho almyrante don Diego Colon de treze años a esta parte poco mas o menos tiempo, e que al fiscal del Rey que no lo conosce.
Preguntado por las preguntas generales, preguntado de qué edad es, dixo que de treynta e cinco años poco mas o menos. Preguntado si es pariente en grado de consanguinydad o de afinydad, criado o famyliar de alguna de las dichas partes dixo que no. Preguntado si tiene enemystad con alguna de las dichas partes dixo que no, etc.
A la segunda pregunta, que sabe la provyncia de Veragua por que la ha visto e estado en ella podrá aver nueve años poco mas o menos, e que las otras provyncias en la dicha pregunta contenydas que no las sabe.
A la quarta pregunta dixo que oyó dezir lo contenydo en la dicha pregunta. Preguntado a quien lo oyó dezir dixo que a Farfan e Terrero e a Requena, e a otras personas.
A la quinta pregunta dixo que la sabe como en ella se contiene. Preguntado cómo la sabe, dixo que la sabe por que vió lo en la dicha pregunta contenydo al tienpo quel dicho almyrante descubrió la dicha provyncia de Veragua que yva este testigo con él por marinero, e este testigo escrivyó en un libro que tenya todas las sierras e rios que vyo en la dicha provyncia e asi lo hazian todos los mas que alli yvan e el dicho almyrante gelo tomó despues.
A la sesta pregunta dixo que la sabe como en ella se contiene. Preguntado cómo la sabe, dixo que por que lo vió e se hallo presente a lo en la dicha pregunta qontenido.
A la setima pregunta dixo, que ha oydo dezir lo en la dicha pregunta contenido. Preguntado a quién lo oyó dezir, dixo que a las personas qontenidas en la quinta pregunta.
A la otava pregunta dixo, que la sabe. Preguntado cómo la sabe dixo que por que lo a oydo dezir, e por que a visto pregonar cartas en las quales se pregona el dytado del almyrante, e en quanto a esto que se refiere a los previllejos del almyrante.
A la nona pregunta dixo, que ha oydo dezir lo contenydo en la dicha pregunta. Preguntado a quién lo oyo dezir, dixo que en la villa de Palos a personas que no se acuerda de sus nonbres.