A la novena pregunta dixo este testigo, que la sabe como en ella se contiene. Preguntado cómo la sabe, dixo que la sabe por que lo oyo dezir a personas que vinyeron con el dicho almyrante al tiempo que descubrio estas yslas e la provincia de Paria. Preguntado a qué personas lo oyo dezir, dixo que a Bartolome Nyño e a Francisco Nyño e a Cristoval Niño, e a otros muchos de cuyos nonbres no se acuerda.
A la decima pregunta dixo, que lo oyo dezir a las personas de suso contenydas en la pregunta antes desta.
A la undecima pregunta dixo que dize lo que dicho ha, etc., e dixo que no sabe escrevir.—Juan Ortiz, liçençiatus.—Pedro de Ledesma.—Diego de Ocaña.
Francisco de Estrada, XXVIII testigo.
El dicho Francisco Destrada, vecino de Puerto Real, testigo presentado por parte del dicho señor almyrante, aviendo fecho juramento fue preguntado por las preguntas generales e por las preguntas del ynterrogatorio por su parte en esta dicha cabsa presentado, e por cada una dellas secreta e apartadamente dixo e depuso lo siguiente:
A la primera pregunta dixo, que conosce al almyrante de doze años a esta parte poco mas o menos tienpo, por le aver visto algunas vezes, e que al fiscal del Rey que no le conosce.
Preguntado por las preguntas generales, dixo ques de hedad de veynte e nueve o treynta años poco mas o menos, etc.
A la segunda pregunta dixo, que sabe las provyncias de Paria e Veragua contenidas en la dicha pregunta, e que las otras provincias que no las sabe. Preguntado cómo sabe las dichas provincias, dixo que las sabe por questuvo en ellas, podrá aver treze o catorze años poco mas o menos, questuvo en la dicha provincia de Paria con Cristoval Guerra, e Veragua quando el almyrante la descubrio.
A la tercera pregunta dixo, que sabe la dicha pregunta como en ella se contiene. Preguntado cómo la sabe, dixo que la sabe por que anduvo por la costa de las dichas provincias e vio que son todas en una costa, por que se corren leste e sueste.
A la cuarta pregunta dixo, que al tienpo queste testigo fue con Cristoval Guerra a la provincia de Paria, oyó dezir a los yndios de la dicha provincia que avya pasado por ally el almyrante don Cristoval Colon, e que desta pregunta es esto lo que sabe.