A la segunda pregunta dixo, que sabe las provincias de Veragua e Paria por que las a visto e estado en ellas, e fue con Cristoval Serrano a la dicha provincia de Paria, e que la otra provincia contenida en la dicha pregunta que no la sabe.
A la tercera pregunta dixo, que ha oydo dezir lo en la dicha pregunta contenido, e lo cree por que como dicho ha, a visto a Veragua e Paria, e dize que la provincia de Urabá está en medio destas. Preguntado a quién lo oyo dezir, dixo que a personas que no se acuerda de sus nonbres.
A la quinta pregunta dixo, que la sabe como en ella se contiene. Preguntado cómo la sabe, dixo que por questuvo en la dicha provincia con el dicho almirante quando la descubrio.
A la sesta pregunta dixo, que no sabe este testigo lo que el dicho almyrante descubrió por que no era marinero ni piloto, pero que oyó dezir a los marineros que alli yvan lo contenydo en la dicha pregunta.
A la novena pregunta dixo, que a oydo dezyr lo contenido en la dicha pregunta, preguntado a quién lo oyo dezir, dixo que a Juan Quintero, padre deste testigo e a otros que no se acuerda de sus nonbres.
A la decima pregunta dixo, que sabe que Pedro de Ledesma que fue con el dicho almyrante al tienpo que descubrió Veragua, fue con Vicentiañes al tienpo que fue a descubrir. Preguntado cómo lo sabe, dixo que lo sabe por que lo oyo dezir a personas que no sabe sus nonbres.
A la undecima pregunta dixo, que dice lo que dicho tiene, etc., e no firmo por que dixo que no sabia escrevir. Fuele encargado el secreto.—Juan Ortiz Matienço, liçençiatus.—Pedro de Ledesma.—Juan de Villegas.
Rodrigo Vergayo, XXX testigo.
El dicho Rodrigo Vergayo, vecino de Lares de Guahava, testigo presentado por parte del dicho almyrante en esta dicha cabsa, aviendo fecho juramento fue preguntado por las preguntas generales e por las preguntas del ynterrogatorio por su parte presentado, e por cada una dellas secreta e apartadamente dixo e depuso lo siguiente: