Pero que oyo dezir que Vicentyanes e Juan de la Cosa avian venido a descubrir la primera vez con el almyrante e despues avian ydo ellos a descubrir.
A la undecima pregunta dixo que dize lo que dicho tiene, e firmolo de su nonbre.—Pedro de las Infantas.—Juan Ortiz, liçençiatus.—Pedro de Ledesma.—Juan de Villegas.
Diego Delgado, XXXIV testigo.
El dicho Diego Delgado, testigo presentado por parte del dicho señor almyrante, aviendo fecho juramento e seyendo preguntado por las preguntas del ynterrogatorio por su parte presentado e por cada una dellas secreta e apartadamente, dixo e depuso lo siguiente.
A la primera pregunta dixo, que conosce al dicho almyrante e al fiscal del Rey que no lo conosce. Preguntado qué tienpo ha que conosce al dicho almyrante, dixo que puede aver doze años poco mas o menos tienpo.
Preguntado por las preguntas generales, dixo ques de hedad de treynta e cinco o quarenta años, e que no es pariente ny criado de nynguna de las partes.
A la segunda pregunta dixo, que tiene noticia de las provyncias de Paria e Veragua, por que las ha andado e estado en ellas; en la de Veragua con el almyrante don Cristoval Colon, e en Paria con Bastidas el año pasado de quinientos e doze, e que las otras provyncias no las sabe, pero que las ha oydo dezir a pilotos que han estado en ellas.
A la tercera pregunta dixo que sabe lo contenydo en la dicha pregunta. Preguntado cómo lo sabe, dixo que lo sabe asi por lo que este testigo a andado por las dichas provyncias como piloto ques, como por que lo ha oydo dezir a otros pilotos que lo an andado. Preguntado a quién lo oyo dezir, dixo que a Juan de la Cosa e a Bartolome Roldan, pilotos, e a otras personas que no se acuerda de sus nonbres.
A la quarta pregunta dixo que la sabe. Preguntado cómo la sabe, dixo que la sabe por que la oyo dezir al tienpo quel dicho almyrante fue a descubrir, a muchos pilotos de Palos, especialmente a uno que llamavan Quintero, piloto o maestre, e a otros muchos que avyan ydo con el dicho almyrante, que no avia descubierto la dicha provyncia otra nynguna persona antes quel dicho almyrante, porque antes nunca este testigo oyo dezir que oviese memoria de la dicha provyncia.
A la quinta pregunta dixo que la sabe. Preguntado cómo la sabe, dixo que por que fue con el dicho almirante don Cristobal Colon el dicho viaje e vio este testigo lo en la dicha pregunta contenido.