Mais tant vous ose dire que pour cellui jour le pareil en beauté ne en force on ne trouvast en terre chrestienne. Dieu et nature n’avoient riens oblié a le former : se la beauté, sens, courtoisie, humilité, hardiesse et proesse qui en lui estoient vous vouloye raconter au long je vous pouroye anuyer. Et avec ce estoit le mieulx chantant et le mieulx denssant qui pour lors se trouvast en France. Quant il fust venu a la feste il n’y eust dames ne damoiselles qui ne fussent esbaÿes et ne changessent couleur de la beauté et des belles et nobles vertus qu’elles virent estre en la personne de Girart ; et pareillement estoit s’amye, laquelle passoit en beauté toutes les autres qui la estoient et estoit la plus loyale en amours envers son amy que oncques on veist. Le jouvencel se approucha de la feste et prinst la chastellaine de Dijon par la main, laquelle moult courtoisement lui pria qu’il voulsist dire une chançon.
« Madamoiselle, dist il, voz prieres me soient commandemens ; ja Dieu ne plaise que le vous refuse. »
Lors Girart de Nevers se prinst a chanter. Apres ce ledit Girart, a qui gaires ne chaloit des envieux, eust dicte sa chançon, il se arresta et dist que bien avoit raison de chanter et mener joye, quant il amoit et estoit amé de la plus belle et plus assouvye qui fust en France, et que ce vouloit maintenir et prouver a l’encontre de tous ceulx qui le contraire vouldroient dire ; puis dist que en mer n’estoit mie sans mast, mais cellui estoit sans mast ou en tel lieu avoit son cuer mis ou il ne scet s’il est amé. « Et pour ce puis je bien dire et affermer que pas ne suis cellui qui ayme sans partie. Car d’elle suis amé plus que dire ne vous sauroye. Et pour ce que d’elle me suis venté pour amour d’elle diray une chançon. » Lors Girart se prinst a chanter si bien et si doulcement et tant bien lui seoit que le roy et la royne et les dames et damoiselles y prenoient le plus grant plaisir du monde.
De la gaigure que Girart de Nevers fist a l’encontre de Liziart conte de Forest.
Quant Girart eust finé sa chançon, fut loé et prisié de pluseurs chevaliers dames et damoiselles. Mais assez en y eust d’autres qui par envye commencerent a murmurer sur lui, dont il en y eust ung entre les autres nommé Liziart conte de Forest, lui esmeu par une tresmauvaise envie si grande que a peu qu’il ne crevoit, car tant estoit felon et plain de mauvais art que oncques en Guenelon n’en eust austant. Grant homs estoit, maigre et sec, hardy et aigre estoit en armes. Et ainsi comme par fierté et desdaing se trouva vers aucuns chevaliers qu’il sentoit estre de sa part et leur dist : « Comment donques entre vous tous n’avez oy ce vassal oultrecuidié a qui il semble que nul de nous se doye comparer a lui ? N’avez oy ses ventanses, comment il va louant s’amye qui croire le vouldroit de pareille n’auroit au monde ! Je sçay bien le contraire de ce qu’il a dit, car il n’est pas tant amé d’elle comme il cuide. Mais se je ne cuidoye troubler le roy ne dire chose qui lui despleust je gaigeroye ma terre a l’encontre de lui qui ainsi s’est venté devant nous tous ; pourveu qu’il en soit content et qu’il ne face point savoir a s’amye la gaigure deans huit jours que je feray ma volenté d’elle sans ce que elle me refuse. Et se ainsi ne le fais comme je vous dis, je lui donne ma terre et seignorie de Forest et de Beaujolois. D’autre part se d’elle je fais mon plaisir, laquelle chose je ne doubte point que je ne face, il me baillera pareillement sa terre et seignorie de Nevers. » Quant le jeusne conte de Nevers Girart oyst ainsi parler Liziart, soy confiant en la loyaulté de s’amye, la belle Euriant, se leva sur piés et dist a haulte voix que de chascun fust entendu, et dist : « Sire Leziart, de la gaigure que voulez faire ne serez escondis. Je vous donne ma conté de Nevers ou cas que vous puissiés venir a chief de l’emprinse que voulés faire, et avec ce vous prometz que par nul homme vivant ne le feray savoir a m’amye en quelque maniere que ce soit. »
Le roy qui la estoit present, oyant la gaigure des deux vassaulx, appella Liziart et lui dist que de ceste gaigure se povoit assés deporter, et que a l’un ou a l’autre porroit venir a trop grant damage.
« Sire, dit Liziart, pour riens ne m’en vouldroye deporter. » Quant il oyst ces paroles il lui dist qu’il se gardast bien qu’il feroit car se il ne venoit a chief de son emprise, ce seroit pour perdre sa terre et que en grant folye se mettoit, que pour honnir et deshonnorer autruy il se mettoit en aventure de perdre tout.
« A sire, dist Girat, je vous supplie humblement que de ceste chose vous vueilliez deporter de plus en parler a Liziart. Car de certain je cuide que avant ce qu’il en peust venir a chief a mon advis il auroit plus tost conquis les Alemaignes. » Quant le roy vist que de ceste fole emprise ne les porroit en riens destourber leur dist que pour asseurer la chose vouloit que chascun d’eulx baillast plaige souffisant pour la gaigeure entretenir. Lors Leziart bailla plaiges et le roy respondist pour Girart de Nevers, apres que les plaiges furent livrez. Leziart a qui il tardoit de son emprinse mettre a fin au plus tost qu’il peust se partist de la court du roy, lui .vi.e de chevaliers vestuz et abilliez en maniere de pelerins, et tant exploita de chevauchier que a ung soir bien tart il ariva a Primery qui est a cinq lieuues de Nevers. Apres ce qu’ilz eurent souppé, alerent dormir, mais Liziart ne peust prendre ung seul somme tant avoit paour de perdre sa gaigure. Quant vinst au bien matin ilz se partirent de Primery et vindrent a Nevers droit a l’eure que la belle Euriant revenoit de l’eglise.
Liziart, qui des honneurs mondains savoit assés, descendit incontinent de son mulet emblant et pareillement ses gens. La noble damoiselle veant les chevaliers descendus, pour venir saluer Liziart se arresta elle et ses damoiselles. Liziart, veant ce, vint a elle et la salua humblement et baisa en la bouche et apres ses damoiselles.