Le duc prinst congié de lui et le conte de Bar son oncle aussi et emmenerent Euriant. Quant le duc fut ou palaix il envoya ses medicins et sirurgiens a Girart pour le visiter. Ilz furent devers Girart et le visiterent mais oncques ne lui trouverent chose parquoy il deust laissier a chevauchier ne aler ou bon lui sembleroit. Quant Girart eust esté visité les maistres prirent congié de lui et retournerent devers le duc et lui dirent comment Girart n’estoit point blecié dont il fut moult joyeux.
Le duc regarda Euriant et lui demanda se point ne cognoissoit ce chevalier qui pour elle s’estoit combatu. « Sire, dit Euriant, je ne sçay qui il est et ne m’est point advis que jamais je le veisse. Dieu par sa grace lui vueille rendre le grant service qu’il m’a fait. En moy n’est le remercier fors de prier pour lui. » Ung peu vous lairons a parler d’Euriant et retournerons a Girart qui est en son hostel. Quant Girart fut desarmé et mis a son aise, son hoste lui fist apporter prepoint, chausses, robe et ung riche manteau d’escarlate fouré d’armines, puis mist ung chappeau de roses sur son chief, et lui attaicha son hoste ung frumeau d’or moult riche garny de pierres precieuses. Quant il fut vestu et paré pluseurs chevaliers qui la estoient venus le louoient et prisoient, disans entre eulx que oncques jour de leur vie plus bel jeusne chevalier n’avoient veu ne qui mieulx semblast estre homme de hault affaire. Il se partist de son logis moult bien accompaignie et ala a la court, ou il trouva le duc et son oncle, le conte de Bar, qui le receurent moult courtoisement. Euriant le prist moult fort a regarder et le recongneust incontinent et se prinst a tressaillir pensant qu’elle porroit faire, d’aler vers lui ou d’attendre qu’il la recougneust, et disoit en soy mesmes : « Vray Dieu, que feray je ? Yray je vers lui, ou se attendray qu’il viengne vers moy ? Certes je cuide que jamais n’y viendroit car de moy ne luy chault. » Lors sans plus dire comme une femme ravye, non saichant qu’il lui estoit avenu, la larme a l’ueil et mains joinctes, se vinst getter devant lui, lui requerant perdon et mercy.
Lors Girart qui la cougneust, la veant ainsi a genoulx plorant devant lui, la prinst par les bras et la leva et l’embrassa et baisa plus de cent fois. Le duc et les barons non saichans leur adventure se prindrent moult fort a esmerveillier, car l’un ne l’autre ne cognoissoient et furent tresdesirans de savoir de leur adventure. « Belle, dist Girart, reconfortez vous. L’adversité et le mal que avons eu ensemble devons prendre en gré et louer Nostre Seigneur puis que tous sommes venus jusques a cy. Saichiés, belle, que au plaisir de Nostre Seigneur je raray ma terre, car a tort et sans cause par Liziart conte de Forest vous et moy avons esté traÿs. » Le duc et les barons les oyans ainsi parler furent tous esbaÿs encores plus que devant, et pria le duc a Girart que dire et racompter lui voulsist son adventure, et dont il avoit congnoissance a ceste damoiselle pour qui il s’estoit combatu. « Sire, dist Girart, puis qu’il vous plaist le savoir je vous en diray la verité. Il est vray que je suis nommé Girart de Nevers, et ceste damoiselle est appellee Euriant fille du conte de Savoye, avec laquelle j’ay esté norry toute ma jeunesse en l’ostel de son pere. Si advint n’a pas long temps que par maladie son pere morust. Elle et moy estans avec la contesse sa mere nous commençasmes de tant amer l’un l’autre que elle fist promesse de soy en venir avec ou cas que lui promeisse de la prendre a femme. Je lui promis que ainsi le feroye.
Lors manday querre aucuns de mes barons pour lors estans en ma conté de Nevers. Elle et moy advisames heure et temps de nous partir ; tant nous exploitasmes et feismes telle diligence que en une nuyt partismes de Chambery et passasmes le mont du Chat et venismes au giste a Roussillon sans avoir quelque empeschement ; puis le lendemain venismes a Bourg en Bresse ; tant exploitasmes de nuyt et de jour que arivesmes a Nevers. » Et ainsi racompta au duc en la presence de ses barons la maniere comment il avoit perdue sa terre, et la traïson que lui avoit faicte par Liziart conte de Forest. Apres leur racompta toutes les aventures qu’il avoit eues depuis. Le duc et les barons oyant Girart ainsi parler et ses aventures furent bien esbaÿs, combien que autreffois en avoient oy parler, mais pas ne savoient la verité comment la chose avoit esté demenee. « Girart, dit le duc, veés icy le conte de Bar mon oncle et moy qui vous offrons a nostre povoir vous servir et accompaignier jusques a ce que vostre terre sera remise en voz mains. » La n’y eust baron ne chevalier qu’il ne lui promist le servir de son povoir. Girart les remercia bien humblement. Il tenoit Euriant par la main, laquelle lui dist. « Sire, la verge d’or que derriement me donnastes ay perdue par la plus merveilleuse aventure dont jamais oyssiés parler. » Lors elle lui conta la maniere comment elle l’avoit perdue comme par adevant le povez avoir oy. Girart et tous ceulx qui la estoient se esbaÿrent et encores plus quant Girart leur raconta la maniere comment par son esprivier l’anel avoit esté recouvré, lequel il tira hors de son doit et le bailla a Euriant. Elle le prinst et le mist en son doy ou autreffois l’avoit porté et en fut tant joyeuse que merveilles ; par layans se devisoient ensemble des grans aventures et fortunes que a Girart estoient avenues ; tous lui fasoient grant honneur et a s’amye Euriant. Le disner fut prest, ilz se misrent a table, et fut Girart assis au dessus. Euriant fut assise entre le duc de Metz et le conte de Bar. Des metz et entremetz dont ilz furent servis ne vous vueil faire long compte, car si richement furent servis que on ne pouroit mieulx. Quant ilz eurent disné ilz commencerent a deviser ensemble des adventures de Girart et de Euriant s’amye.
Comment Girart vinst au tournoy a Montargis et es monstres.
A ceste heure qu’ilz furent levez de table ariva leans ung jeusne escuier moult courtois et bien aprins. Quant il veist le duc, humblement lui fist la reverence. Le duc qui bien le congnoissoit en sousriant lui dist que bien fust il venu et que dire lui voulsist de ses nouvelles. « Sire, dist il, monseigneur le conte d’Alos vous mande salut par moy, lequel j’ay laissié a Montargis, ou le roy est et tous les grans seigneurs et barons de France. Si advint mardy passé apres souppé Liziart conte de Forest et le conte de Montfort eurent pluseurs hautaines paroles ensemble et tant que le conte de Montfort reprocha a Liziart que par grant mauvaistié il avoit esté cause d’avoir destruit Girart de Nevers et Euriant s’amye qui estoit sa niepce, et que par lui et par son fait eulx deux estoient alez en essil. Tant hault monterent les paroles d’un costé et d’autre que par grant couroux ilz ont entreprins ung tournoy ou chascun d’eulx doit estre accompaignié de ses amis. Et pour ce vous mande vostre cousin le conte d’Alos que vostre arnois mettez a point et vous appareilliez pour estre ce jour au tournoy. Car le conte de Montfort par le grant dueil et courroux qu’il a eu pour sa niepce qui est perdue a mandé tous ses parens et amis. »
Le duc oyant ses nouvelles fut tresjoyeux, mais sur tous autres Girart le fut merveilleusement. Telle joye et lyesse en eust au cuer pour les bonnes nouvelles que advis lui estoit qu’il fust desja au tournoy. Moult desiroit la journee et l’eure que son anemy peust rencontrer. Quant le duc eust oy ces nouvelles, il appella son seneschal et lui commanda que cent arnois fist aprester et les parures et habillemens tous blans pour accompaignier Girart de Nevers auquel il desiroit moult faire service et lui aydier tant qu’il revist sa terre, que Liziart avoit et tenoit par mauvaise traÿson. Le seneschal oyant le commandement du duc fist tout aprester : cent harnois blancs, cent heaumes, cent lances, cent housseures tous blancs comme niege. Quant le duc veist que tout fut prest il fut bien joyeux. Il commença deviser a Girart et lui dist que par droit et raison il devoit bien amer s’amye, car par pluseurs fois il l’avoit requise qu’elle le voulsist avoir a mariage mais oncques ne le volt consentir pour don ne pour promesse que lui sceust faire, mais disoit que tout son temps avoit esté fole femme et de la plus mauvaise vie que jamais femme fut. « Car moult voulentiers l’eusse prinse ce n’eust esté par mes barons qui m’en destourberent. » Quant Girart oïst ainsi parler le duc il fut bien joyeux. Tous les maulx et peines qu’il eust oncques pour elle a celle heure furent obliez pour amour de ce que ainsi saigement s’estoit gouvernee. « Sire, dist Euriant, pas ne vous amoit cellui que si grant peine a mis de vous avoir eslongnié de moy, mais vostre peine et traveil est alegee puis que trouvee m’avez. Loé en soit Nostre Seigneur qui nous a fait ceste grace. Auquel nous devons prier que le demeurant vueille conduire et parfaire ainsi qu’il scet que besoing nous est. »
Ainsi qu’ilz estoient en ses devises le conte d’Alos arriva en la cité de Metz et vinst descendre ou palais et monta amont les degrez en grant compaignie de chevaliers. Avant que de sa venue le duc fust en riens adverty il entra par layans. Quant le duc le veit venir il ala au devant de lui et l’embrassa et incontinent lui racompta la venue de Girart de Nevers dont il fut moult joyeux. Il vinst vers lui et le prinst par la main en soy offrant a le servir de tout son povoir. Girart le remercia chierement. « Girart, dist le conte d’Alos, ores est l’eure et le temps venu que plus deviés desirer, si est de ce que si a point estes venu que a vous ne tient, fors de vous vengier de cellui par quy vous avez esté desherité. Maintenant est en vous d’en prendre vengence. Vostre force ne proesse ne prise en riens se maintenant ne le monstrez. Et quant est a moy pour vous servir suis prest de habandonner corps bien et avoir. » Lors Girart moult courtoisement remercia le conte et lui dist : « Sire, du grant service que me offrez vous remercie, et me doint Dieu tant vivre que le vous puisse remerir. J’ay esperance en Dieu que la peine et le traveil que a sa cause et par sa desloyale traÿson j’ay souffert auray vengence de lui, ou je y moray a la peine. Moult me tarde l’avoir trouvé. » Apres commencerent a parler de pluseurs autres choses. Le souppé fut prest, ilz se misrent a table. Le duc et tous les autres barons firent grant chiere ; chascun se devisoit du tournoy a venir ; peu en y avoit qui ne le desirast. Quant vinst apres et que chascun eust fait bonne chiere et devisé, chascun se retrayst, mais celle nuyt Girart gaires ne dormist pour le grant pensement et desir qu’il avoit de soy trouver ou tournoy. Quant vinst le matin qu’il fut jour chascun se leva, duc, contes et chevaliers qui avoient tout fait aprester pour partir. Les chevaulx furent prestz, entre lesquelx y avoit une belle aguenee sur quoy Euriant monta avec grant compaignie de dames et de damoiselles qui l’accompaignerent. Chascun monta a cheval ; les harnois et bagues furent mises sur chariotz qui estoient desja devant ; tous partirent ensemble de la ville, et tant chevaucherent ensemble qu’ilz vindrent ensemble a Bar le Duc ou le conte les festia haultement car il en estoit adverty. Lequel parla a Girart qui estoit averty de son fait et lui dist que de sa venue estoit moult joyeux et que ores estoit l’eure se jamais le vouloit faire de soy vengier de cellui par quy il avoit tant souffert de maulx. « Sire, dist Girart, Dieu me doint le povoir comme j’ay la volenté de ce faire. » Celle nuyt furent moult bien festiez. Quant vinst le matin, tout fut prest ; chascun monta a cheval ; ilz traverserent la champaigne et chevaucherent tant qu’ilz vindrent a Moret en Gastinois. Quant ilz furent arrivez ilz trouverent beaucop de seigneurs qui aloient au tournois. Ilz firent celle nuy bonne chiere. Quant vinst le demain au matin tout fut prest pour partir, et envoyerent devant leurs forriers a Montargis pour prendre les logis, mais ilz trouverent la ville tant plaine de gens et les fourbours que les jardins estoient tous plains. Mais par l’ordonnance du roy logis leur fut delivré, c’estassavoir pour le duc et sa compaignie, combien que de Girart ne fut oncques faicte mencion car il leur estoit deffendu. Incontinent apres que les logis furent prins, le duc de Metz et Girart ensemble leurs gens vindrent, et demeura Euriant au logis jusques a ce que Girart l’envoieroit querre. Quant ilz entrerent a Montargis ilz avoient grant compaignie avec eulx. Le duc et Girart aloient ensemble, le conte de Bar et le conte d’Alos apres, puis les autres barons et chevaliers apres, et vindrent en leur logis descendre. Le disner fut prest, ilz se misrent a table. Quant ilz eurent disné ilz se leverent de table ; l’eure vinst que les monstres se firent et furent cent chevaliers qui furent tous d’une compaignie. Girart estoit ou milieu d’eulx que oncques par homme ne fut recougneu. De ceulx qui furent es monstres, tant d’un costé que d’autre, ne vous vueil faire long compte affin de abregier nostre matere.
