Quant Liziart eust fait hommaige au roy, lui accompaignié de ses amys prist congié du roy et s’en ala de tire a Nevers ou il fust receu des bourgeois a seigneur, mais oncques plus grant pitié ne fust veue, pour les piteux regretz qu’ilz fasoient de leur naturel seigneur et de leur damoiselle que ainsi avoient perdus, et estoient de povres et de riches fort plains et regretez. Mais a Liziart ne a la faulce vielle n’en chaloit gaires pour ce qu’ilz se veoient au dessus de leurs besoingnes. Et eust la vielle le gouvernement de toute la conté de Nevers, et estoit Liziart content de tout ce qu’elle vouloit sans riens contredire, et se monstroient moult grant amour l’un a l’autre ; mais la vielle estoit tant haÿe par tout le païs que ce n’eust esté pour doubte de Liziart on l’eust gettee en ung puis ou en la riviere pour les mauvaises coustumes, tailles et gabelles qu’elle avoit mis sus. De Liziart et d’elle lairay a parler et parleray de Girart de Nevers et s’amye la belle Euriant.
Comment Girart volt copper la teste a Euriant s’amie en la forest d’Orliens, du serpent qui lui vinst corir sus, et comment il la laissa toute seule en ladicte forest.
Bien avez oy parcidevant le piteable departement de Girart de Nevers et de s’amye. Apres ce qu’ilz furent departis de Melun eulx deux ensemble plains de tristesse et de melencolie entrerent en une forest ou tout le jour sans boire et sans maingier furent, jusques ce vint apres jour failly qu’ilz trouverent ung petit hostel de povres gens ou celle nuyt logerent, puis le matin se departirent en eulx tellement exploitant qu’ilz ariverent en la forest d’Orliens. Girart, veant que assés loing de gens estoient et qu’il ne veoit homme, il regarda a costiere du chemin et choisist ung moult gros chaisne soubz lequel il descendist et fist descendre Euriant et ataicha les chevaulx a ung arbre, et vinst apres a Euriant et lui dist : « Par vous et vostre desloyauté j’ay perdu toute ma terre ; par vous suis escillié, ne jamais en court de prince n’est besoing de moy trouver. Saichiés que jamais apres moy ne tromperez homme : aujourd’uy est venu vostre derrain jour. » La belle Euriant se mist a genoulx devant lui, lui requerant que d’elle voulsist avoir compassion. « O tresdesloyale et mauvaise, vous ressemblez a Briseida l’amye de Troylus et encore pire, car dame et maistresse vous avoye faitte de mes terres et seignories, mais par vostre desordonnee laicherie m’avez rendu mal guerdon ; et pour ce vous paieray la desserte que avez gaignee. »
Alors Girart en ostant amour et pitié de lui comme celui qui a l’eure estoit remply de yre et de couroux prinst Euriant par les cheveux et tira son espee, et ainsi qu’il cuidoit frapper, Euriant vist venir ung grant et orrible serpent, et dist a Girart : « A, sire, pour Dieu sauvez vous, regardez venir contre vous une beste moult orrible et espoentable. » Grosse avoit la teste et les yeux plus ardans que feu. La quehue avoit moult grande et eserchelee.
« A, sire, dist Euriant se tost ne vous gardez et que vous fuyez, il est imposible que par elle ne soyez devoré ; quant est de moy, puis que morir me couvient, ne me chault soit par vous ou par la beste estre devoree. Car je voy bien que par autre maniere ne puis eschapper. » Lors Girart laissa la belle Euriant et regarda la orrible beste qui venoit contre lui le grant pas. Lui, comme cellui qui en riens ne doubtoit la mort, conclud en soy que pour paour il ne lairoit de soy esprouver a l’encontre du serpent. Lors il laissa Euriant et envelopa son manteau alentour de son bras, l’espee ou point, et vint contre le serpent. Lequel serpent venoit gulle ouverte gettant une flambe moult orrible et puant. Girart qui moult estoit hardy advisant le serpent qui venoit pour l’englotir prinst son espee par la croix et la getta de grant force en la gorge du serpent et tellement qu’il lui trencha le foye et le vint attaindre au cuer. Quant le serpent sentist le cop il getta ung cry si orrible que toute la forest retentissoit et chut le serpent a terre. Lors Girart, veant la beste estre morte, prinst herbes et fueilles en sa main et tira son espee hors de la gorge du serpent, puis a ung petit ruissot d’une fontaine la estant la lava et l’essua a son mantel et le rebouta ou forreau.
Comment Girart se mist a genoulx rendant graces a Dieu de ce qu’il estoit eschappé et qu’il avoit tué le serpent et comment il laissa Euriant seule.
Apres ce que Girart eust occis le serpent orrible il se mist a genoulx les yeux contre le ciel, rendant graces a Dieu de ce qu’il avoit vaincu le serpent, et pensa en son coraige et dist : « O vray Dieu, vueilliez moy aidier : comment me seroit il possible ne avoir le corage de mettre a mort celle qui m’a saulvee la vie ? Car se par elle n’eusse esté adverty j’eusse esté tué du serpent. Certes pour riens mal ne lui feroye, car raison y est grande, car maintenant avoye l’espee ou point pour la tuer et copper la teste, et quant elle a veu venir l’orrible serpent pour moy sauver la vie m’a dit que me gardeisse. Laquelle chose n’eusse jamais pensé ne aussi ne croiroie qu’il fust femme au monde qui eust le coraige ne telle volenté de vouloir sauver ne garentir de mort cellui qui la vouldroit tuer, par ainsi lui vueil sauver la vie, ja soit ce qu’elle m’a fait perdre ma terre ; combien qu’elle demorra seule, dont j’ay pitié quant il couvient que seule et esgaree je la laisse. Certes a tousjours mais ara m’amour. Mais nulz homs vivans ne le saura. Icy la lairay sans ly aucun mal faire. Dieu par sa grace la vueille pourveoir et pardonner son meffait. » Il vinst vers la damoiselle et lui dist : « Euriant, en la garde de Nostre Seigneur te laysse, auquel je prie humblement que de mal te vueille garder et toy pardonner la faulte que m’as faicte. » Et la laissa toute seule et monta sur son cheval prenant son chemin en la forest. Et la belle Euriant seule et esgaree demeura au bois moult doulante en faisant ses regrez piteux, detordant ses mains, tirant ses cheveulx, et disoit : « Las moy chetive, a male heure fus oncques nee quant ainsi a tort et sans cause mon amy c’est departy de moy et m’a ainsi laissee seule et perdue en my ce bois. »
