¶Laduocat
Cest bien droit que raison se face
Ne ie ny scay mettre deffence
Contre mort na respit ne grace
Nul nappelle de sa sentence
Iay eu de lautruy quant ie y pense
Dequoy ie doubte estre repris
A craindre est le iour de vengeance
Dieu rendra tout a iuste pris
¶Le mort
Menestrier qui dances et notes
Scauez: et auez beau maintien
Pour faire esiouir sos et sotes
Quen dictes vous: alons nous bien
Monstrer vous fault puis que vous tien
Aux autres cy vng tour de dance
Le contredire ny vault rien
Maistre doit monstrer sa science
¶Le menestrier
De danser ainsi neusse cure
Certes tresenuiz ie m'en mesle
Car de mort nest peine plus dure
Iay mis soubz le banc ma vielle
Plus ne corneray sauterelle
Nautre danse. mort men retient
Il me fault obeir a elle
Tel danse a qui au cueur nen tient
¶Le mort
Passes cure sans plus songer
Ie sens questes abandonne
Le vif/ le mort solies menger
Mais vous seres aux vers donne
Vous fustes iadis ordonne
Miroer dautruy et exemplaire
De voz fais seres guerdonne
A toute paine est deu salaire