¶Le mort
Sire chanoine prebendez
Plus naurez distribution
Ne gros: ne vous y attendez
Prenez cy consolation
Pour toute retribution
Mourir vous conuient sans demeure
Ia ny aurez dilation
La mort vient quon ne garde leure
¶Le chanoine
Cecy guere ne me conforte
Prebende suis en mainte eglise
Or est la mort plus que moy forte
Qui tout emmaine: cest sa guise
Blanc surpelis: aumusse grise
Me fault laisser: et a mort rendre
Que vault gloire si tost bas mise
A bien mourir doit chascun tendre
¶Le mort
Marchant regardez par deca
Plusieurs pays auez cherchie
A pie: et a cheual de pieca
Vous nen serez plus empesche
Vecy vostre dernier marche
Il conuient que par cy passez
De tout soing serez despesche
Tel couuoite qui a assez
¶Le marchant
Iay este a mont et aual
Pour marchander ou ie pouoie
Par long temps: a pie: a cheual
Mais maintenant pers toute ioye
De tout mon pouoir acqueroye
Or ay ie assez mort me contraint
Bon fait aler moyenne voye
Qui trop embrasse peu estraint
