La damoiselle.
Sire chevalier aincoires me plaist il savoir de vous une demande. ilz sont deux damoiselles soeurs toutes d'un sens et d'une beauté desqueles vous amez l'une parfaitement et si savez bien que point ne vous aime. Et l'autre vous aime de tout son cuer. Or est le cas tel qu'il leur fault passer une riviere. mais la fortune est qu'il convient l'une d'elles noyer. et en vous est de rescourre et sauver laquele qu'il vous plaist. Si vous prie que me dittes laquelle vous sauveriez ou celle qui vous aime ou celle qui point ne vous aime
Le chevalier.
Certes damoiselle je rescourroie celle que j'ameroie. Car ce seroit grande desloyauté de laissier perir ce que mon cuer ameroit dont jamais il n'auroit joye. Et combien que de present elle ne m'aimast point si auroie tousjours espoir que en temps avenir elle auroit de moy pitié car espoir est ce qui soustient les amans et non autre
La damoiselle
Sire chevalier je vous demande auquel des deux il convient plus grant sens a l'amant/ ou a acquerre amours ou merci de sa dame: ou a garder amours et merci quant la dame en a fait l'ottroy.
Le chevalier.
Damoiselle a garder amours et merci quant on en a l'ottroy. Car trop est prez envie de dangier qui tousjours agaittent les amoureux pour les surprendre et empeschier leurs deduis et plaisances.
La damoiselle.
Sire chevalier je vous demande laquele amour est plus durable et plus aspre ou celle qui se fait de regard sans parler ou celle qui est ditte de bouche.