La damoiselle.
Sire chevalier mieulx ameroie qu'il morust pour l'amour de moy car se morte estoie pour l'amour de luy on n'en feroit que mocquier et se je vivoie aprés lui j'auroie toute ma vie regret et souvenance de son amour.
Le chevalier.
Certainement damoiselle aprés celle response plus ne vous veuil traveillier attendu que en ce seroie d'oppinion contraire. car mieulx ameroie morir pour l'amour de madame qu'elle morust pour l'amour de moy et a ce y a bonne rayson. car la reste de ma vie ne me seroit que langueur et deshonneur et mieulx vault morir a honneur que vivre a honte et ainsy me seroit la vie pire que mort.
Mes dames et vous mes damoiselles qui avez veu et leut cy dessus les demandes et responses amoureuses et honnestes pour entretenir en gracieuses devises chevaliers et gentilz hommes/ je vous suplie que se aucune chose y avez trouvé qui soit a vostre desplaisance que le me pardonnés. Car il ne m'a esté possible de tout avoir retenu ce que par ci devant ay oy et veu. ne aussy du temps present ne puis rendre raison queles devises les nobles et frisques damoiselles ont envers leurs mignons comme je soye de leur compaignie banni pour dame viellesse a tout son fronchié visage qui m'est venue audevant pour le desplaisir de laquele jonesse la fresche et envoisie est departie de ma compaignie et a emporté de moy beauté qui moult m'estoit favorable et propice et pour laquele j'estoie appellé et bien venu entre les dames. Or ne me reste doncques autre poissance que d'en deviser/ et aussi mettre par escript ce qu'en puis avoir retenu. Et pour ce que du temps passé je me suis trouvé par fortune qui m'a mené en pluiseurs et diverses compaignies aussy bien moiennes et basses d'estat comme nobles et hautes. je veuil maintenant reciter pluiseurs demandes et adevinailles que soloient faire les jones compaignons de mon temps aux matrones et filles es assembleez qu'ilz faisoient es longues nuis d'yver aux series pour passer plus joyeusement icelles. Et s'il y a chose un pou grasse il me soit pardonné/ car c'est ouvrage et devises de nuit
S'ensieut icelles demandes.
Une chose fut trouvee qui oncques esté n'avoit/ et cellui qui riens n'y avoit le donna a cellui a qui c'estoit.
Response.
Ce fut le sainct baptesme que sainct jehan donna a nostre sauveur jhesucrist.
Demande.