Puis que vous ne la veyés mye
Cause n'aviez d'estre joyeux
Car estoit puet estre endormie
Quant ainsy vous riés aux cieux
Auffort vous rapaisiés vos yeux
Des fenestres ou des violiers
Et vous profitoit cela mieux
Que d'avoir escuz a milliers
L'amant
Ce soir dormis plus seurement
Que par avant n'avoye dix jours
Tant sentoie grant allegement
D'ainsi avoir veu mes amours
Sy faisoye lors mout de clamours
Au lieu en merciant la belle
Du confort et joyeux secours
Que j'avoye eu au moyen d'elle
Damp prieur
Or sire par ce seur dormir
Que tenez de cy grant valeur
Sentiés vous point le cueur fremir
Et entrer en froit ou challeur
Vous sembloit le repos meilleur
Que n'aviez dont acoustumé
Ou se de joye ou de douleur
Estiés point transi ou pasmé
L'amant
Tellement estoie restauré
Que sans tourner ne travailler
Je faisoie ung somme doré
Sans point la nuyt me resveiller
Et puis avant que m'abiller
Pour en rendre a amours louenge
Baisoie troys foys mon orillier
En riant a par moy aux anges
Damp prieur
Du temps que ceste nuyt duroit
La songiés vous point nullement
Ou se vostre oeil la desiroit
Point veoir illec visiblement
Car de tel mondain pensement
Adviennent maintes frenaisies
Qu'on cuide estre vrays proprement
Et sy ne sont que fantasies