De l'une a l'autre resembler
y avoit grande difference
Jaçoit ce que pour tant troubler
Ne deviés n'avoir desplaisance
Or après ceste diligence
Qu'il failloit repaistre ung petit
Mengiés vous saulce vert ou jaune
Pour trouver meilleur appetit
L'amant
A table tout trouvoye amer
Et ainsy en lieu de menger
Lors entroie en haulte mer
Et ne savoye que forger
Mon esbat estoit de songer
Ou de froter mes paupieres
Et puis pour mon mal alleger
Faisoye des croix aux sallieres
Damp prieur
N'aviés vous ailleurs ou jouer
Ne prendre vostre esbatement
Jectiés vous vostre trenchouer
Point par despit ou vengement
Mengiés vous tost ou bellement
Je croy que n'y preniés point garde
Ou quelle viande nullement
Goust n'aviés tant estiés malade
L'amant
Illec point je ne demouroye
Car les napes cy me soulloient
Et la mort souvent desiroye
Les gens m'ennuyoient qui parloient
Les oyseaux mesmes qui voloient
Sy me faisoient mal en la teste
Jeux ny esbas rien n'y valoient
Car tout me tournoit a tempeste
Damp prieur
C'est a vous trop fait d'exés
Pour une plaisance mondaine
Car de la viennent les assés
De double fievre traversaine
L'en court l'en fuit l'en se demaine
Puys on a froit puis on a chault
Brief les amans ont assez peine
Et sy a personne n'en chault