Comment Pantagruel rencontra ung Limosin qui contrefaisoit le languaige françoys.
«Quelque jour, je ne sçay quand, Pantagruel se pourmenoit après souper avecques ses compaignons, par la porte d'ond l'on va à Paris: là rencontra ung escholier tout joliet, qui venoit par icelluy chemin; et, après qu'ils se feurent saluez, luy demanda:
»—Mon amy, d'ond viens-tu à ceste heure?
»L'escholier lui respondist:
»—De l'alme, inclyte et celebre academie que l'on vocite Lutece[8].
»—Qu'est-ce à dire? dist Pantagruel à ung de ses gens.
»—C'est, respondist-il, de Paris.
»—Tu viens doncques de Paris? dit-il. Et à quoi passez-vous le temps, vous aultres messieurs estudians audict Paris?
»Respondist l'escholier:
»—Nous transfretons la Sequane au dilucule et crepuscule: nous deambulons par les compites et quadeivies de l'urbe, nous despumons la verbocination latiale; et, comme versimiles amorabonds, captons la benevolence de l'omnijuge, omniforme et omnigene sexe feminin[9]...