SCENE V.
PORCIE, BRUTE.
PORCIE.
Tu vas donc au combat?
BRUTE.
La liberté m'appelle,
Et je serois content de m'immoler pour elle,
Si je pouvois sçavoir ma Porcie en repos,
Loin des troubles que Mars
PORCIE.
Brise là ce propos,
Il choque ma vertu qui seroit offensee
S'il estoit aprouvé d'une seule pensee;
Quoy! Brute doute encor que mon affection
Ne soit pas au degré de la perfection:
Du repos loin de luy, sans qui mesme la vie
Ne sçauroit me durer que contre mon envie.
Ha! c'est trop, & ce coup me touche plus le coeur.
Que la crainte de voir nostre ennemy vainqueur.
La fille de Caton nasquit parmy les armes,
Les horreurs des combats ont pour elle des charmes;
Et son repos s'y treuve ainsi qu'en tous les lieux,
Où Brute luy paroist favorisé des Dieux.
Que le Ciel conjuré se range pour Octave,
Que le peuple Romain demande d'estre esclave,
Que par ces changemens l'espoir te soit osté,
De restablir jamais l'antique liberté.
Qu'apres estre bannis de nostre chere terre,
Tout l'Empire assemblé nous declare la guerre,
Et que tous les malheurs accompagnent nos pas,
Si je suis avec toy, je ne me plaindray pas.
BRUTE.
Que percé de cent coups au milieu des batailles,
Le vainqueur insolent m'arrache les entrailles;
Si tu vis pour chanter l'honneur de mon trespas,
Fut-il plus violent, je ne me plaindray pas.